त्यंगः त्वाःया दाफा बाजं प्रशिक्षण समापन

येँ(नेपालभाषा टाइम्स)- त्यंगः त्वाः खलःया ग्वसालय् न्ह्यानाच्वंगु दाफा बाजं प्रशिक्षण क्वचाःगु दु । वंगु शनिवाः थनया नेपाः ब्यांक्वेटय् छगू ज्याझ्वः यासें बाजं प्रशिक्षण समापन याःगु खः । समापन ज्याझ्वलय् त्वाःया न्हूम्ह दाफा गुरुया घोषणालिसें त्यंगः त्वाः गणेद्यःया म्येँ नं पितब्वज्या याःगु खः ।

खलःया नायः धनबहादुर तिमिलाया सभापतित्वय् जूगु ज्याझ्वलय् येँ महानगरपालिकाया पुलांम्ह मेयर विद्यासुन्दर शाक्य मूपाहांकथं झायादीगु खः । ज्याझ्वलय् ज्यापु महागुथि नेपाःया नवनिर्वाचित नायः सत्यनारायण डंगोल, लोककवि राजभाई जकःमि, येँ महानगर सम्पदा तथा पर्यटन विभागया प्रमुख अर्चना शाक्य विशेष पाहाकथं झायादीगु खः ।

ज्याझ्वलय् ज्यापु महागुथि नेपाः येँ महानगरया नायः पंचनारायण महर्जन, ज्यापु संस्कृति विकास कोषया नायः मंगलकृष्ण सिंह व येँ महानगरपालिका १८ वडा नायः न्हुछेकाजी महर्जन पाहांकथं झायादीगु खः ।

ज्याझ्वलय् खलःया न्हूम्ह दाफा गुरु मणिकण्ठ महर्जनयात सभानायःलिसें खलःया नायः धनबहादुरं दोसल्ला न्ययेकादीगु खःसा मूपाहां विद्यासुन्दर शाक्यं सम्मानपत्र लःल्हानादीगु खः । थुकथं हे ज्याझ्वलय् दाफा बाजं व दाफा म्येँ स्यनादीपिं गुरुपिंत नं मूपाहांपाखें दसिपौ लःल्हाःगु खः ।

उगु इलय् त्यंगः त्वाःया गणेद्यःया दाफा म्येँ नं पितब्वज्या याःगु खः । खलःया नायःया परिकल्पनाकथं लोककवि जकःमिं चिनादीगु त्यंगः गणेद्यःया म्येँ मूपाहां विद्यासुन्दरं पितब्वज्या यानादीगु खःसा म्ये च्वयादीम्ह जकःमियात हनेज्या नं याःगु खः ।

थुकथं हे ज्याझ्वलय् त्यंगः त्वाःया न्याम्ह थाकुलिपिं छसिकथं तीर्थनारायण महर्जन, देवनारायण महर्जन, कृष्णनारायण महर्जन, पंच महर्जन व तीर्थरत्न महर्जनलिसें सुलिं अनिष महर्जन, पुष्प महर्जन, राजिव डंगोल, सुवाः मचाकाजी महर्जन (बहति), मचाकाजी महर्जन (खुसिबुँ), कुलबहादुर महर्जन, नानीकाजी महर्जन, बालकृष्ण महर्जनयात नं हनेज्या याःगु खः । अथे हे खलःया ग्वसालय् जूगु दाफा म्येँ व बाजं प्रशिक्षणय् ग्वाहालि यानादीपिंत नं हनेज्या याःगु खः ।