ने. सं. ११४६ बछलागा तृतीया -

स्थापित खलःया झिंप्यक्वःगु दँमुँज्या

येँ (नेपालभाषा टाइम्स)( स्थापित खलःया झिंप्यक्वःगु दँमुँज्या क्वचाःगु दु । उदाय समुदाय दुने थीथी कवःमध्ये छगू स्थापित खलःया दँमुँज्या थनया पचली भैरव द्यःयाथाय् जूगु खः ।

खलःया नायः दीपक स्थापितया सभापतित्वय् न्ह्याःगु ज्याझ्वलय् मूपाहांकथं झायादीम्ह खलःया सल्लाहकार कृष्णहरी स्थापितं त्वाःदेवाय् मत च्याकाः दँमुँज्याया उलेज्या यानादीगु खः । ज्याझ्वलय् स्थापित समुदायं याना वयाच्वंगु थीथी गतिविधि व ज्याझ्वःयात कःघाना अनिल स्थापितं सम्पादन यानाः तयार यानादीगु खलःया ख्वाःपौया नं पितब्वज्या याःगु खः ।

खलःया दुजः प्रमिल स्थापितं लसकुस यासें न्ह्याःगु ज्याझ्वलय् दछिया दुने दिवंगत जुयादीपिं खलःया जःपिनिगु लुमन्तिइ छगू मिनेट मौन धारण नं याःगु खः । दँमुँज्याय् खलःया छ्याञ्जे ज्ञानेन्द्र स्थापितं प्रगति विवरण व दांभरिं लक्ष्मण स्थापितं आर्थिक विवरण न्ह्यब्वयादीगु खः । ज्याझ्वलय् मूपाहां, खलःया नायःलिसें सुवर्णकाजी स्थापित, पे्रमकाजी स्थापित, नन्दरत्न स्थापित, श्रीदिगुख्यः गुथिया छ्याञ्जे प्रज्ञारत्न तुलाधर, तबः समाजया नायः सुर्यरत्न ताम्राकारं भिंतुना न्वचुलिसें नुगःखँ तयादीगु खः ।

उगु इलय् स्थापित समुदायया ज्याथःजिथिपिंत हनेज्या नं याःगु खः । ज्याझ्वलय् डा. प्रेमरत्न स्थापित, ज्ञानलक्ष्मी स्थापित, पूणर्रत्न स्थापित, रत्नशोभा स्थापित, रुपेन्द्ररत्न स्थापित, सानुरत्न स्थापित, माणिकरत्न स्थापित, अमलशोभा स्थापित, नन्दमान स्थापित सुशिला स्थापितयात नेवाः परम्पराकथं ख्यें सगंलिसें दोसल्ला न्ययेकाः, देछा देछानाः हनेज्या याःगु खः ।

दँमुँज्याया झ्वलय् शिक्षा ख्यलय् उत्कृष्ट ल्याः हयादीपिंत पदक व सिरपाः नं लःल्हाःगु खः । ज्याझ्वलय् एसइइनिसें विद्यावारिधी यानादीपिंत संघरत्न दानमाया स्मृति सिरपाः, केशवदास हिरादेवी स्मृति सिरपाः, दानरत्न स्मृति सिरपाः, ज्योतिरत्न स्मृति सिरपाः, मोहनमान स्मृति सिरपाः, सानुरत्न स्मृति सिरपाः, रत्नकाजी सूर्यदेवी हना स्मृति सिरपाः, ज्ञानशोभा सरकारी जागीर हना व सुवणर्लक्ष्मी स्मृति दुजः हना लःल्हाःगु खः ।

थुकथं हे न्यत तुलाधर समितिया ग्वसालय् जूगु उदाय क्रिकेटय् न्हाप लाकेत ताःलाःपिं खलःया कासापिंत नं ख्यें सगं बियाः हनेज्या याःगु खः । अथे हे थीथी विहारय् गुलुपाः दान यानादीम्ह गुलुपाःरत्नया नामं म्हसिउम्ह जीवरत्न स्थापितया छेँजःपाखें ज्याथःजिथिपिं सकसितं गुलुपाः छगः छगः नं देछाःगु खः ।