ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

मिस नेवाः पोखराया प्रतियोगिपाखें येँ व किपूया अवलोकन

येँ – मिस नेवाः पोखरा–११४०य् ब्वति कयाच्वंपिं प्रतियोगीपिंत येँ महानगरया सम्पदा क्षेत्रया अवलोकन भ्रमण याकूगु दु । नेवाः सम्पदा, भाषा, कला, संस्कृति, सभ्यताया अध्ययन यायेत वयाच्वंपिं प्रतियोगीपिंत विश्व सम्पदाया धलखय् दुथ्यानाच्वंगु येँया हनुमानध्वाखा, बसन्तपू व स्वयम्भू लागाया अवलोकन भ्रमण याकेगु ज्या जूगु खः ।

वय्कःपिंत येँ महानगरपालिका हनुमानध्वाखा दरवार संरक्षण कार्यक्रमा प्रमुख रोशन शाक्य, येँ मनपा १९ वडाअध्यक्ष शशीलाल श्रेष्ठ, २० वडाअध्यक्ष राजेन्द्र मानन्धर, २३ वडाअध्यक्ष मचाराजा महर्जन व २५ वडाअध्यक्ष बालकृष्ण श्रेष्ठपिंसं लसकुस यासें येँ लाय्कू लागा बारे जानकारी याकादीगु खः ।

अध्ययन भ्रमणय् वयाच्वंपिंत बसन्तपूस्थित कुमारि छेँये लसकुस यासें कुमारि माजुया नं दर्शन याकूगु खःसा येँय् लाय्कू, हनुमानध्वाखा संग्रहालय, मरुसतः, गद्दी बैठक, माजु देगः, लगायत उगु क्षेत्रय् च्वंगु सम्पदालिसें भुखाचं जूगु क्षति लिपा जुयाच्वंगु पुनःनिर्माणया बारे जानकारी बियाः अवलोकन याकूगु खः ।

उगु इलय् येँ मनपा सम्पदा समितिया कजिलिसें येँ मनपा १८ वडाअध्यक्ष न्हुछेकाजी महर्जनं विश्व सम्पदाया धलखय् दुथ्यानाच्वंगु नापं येँ महानगरया मूर्त व अमूर्त सम्पदाया संरक्षणया निंतिं येँ मनपां म्हिता वयाच्वंगु भूमिका बारे जानकारी बियादिसें थुकिया संरक्षण व प्रवद्र्धनया निंतिं पुस्तान्तरण जुया वनेमाःगु विचाः तयादीगु खः ।

अवलोकन भ्रमणय् थःपिंत ग्वाहालि याःगु धासें मिस नेवाः पोखरा ग्वसाः खलः कास्की नेवाः खलःया मूछ्याञ्जे सुविन्द्र श्रेष्ठं येँ महानगरपालिकायात सुभाय् देछासे मतिनाया चिं नं लःल्हानादीगु खः । स्वयम्भूया अवलोकन भ्रमण लिपा उगु पुचःयात नेवाः भ्वय् नं नकूगु खः ।

अथे हे उगु पुचलं थनया वंघःस्थित श्री आकाश भैरव आजुद्यःया नं दर्शनयासे जानकारी काःगु खःसा वय्कःपिंत शरद डंगोलं जानकारी बियादीगु खः । थुकथं हे प्रतियोगीपिंसं किपू देय्या नं अवलोकन भ्रमण याःगु दु । किपुलिइ वय्कःपिंत किपू नगरपालिकाया प्रमुख रमेश महर्जनं लसकुस यानादीगु खः ।