किपू नपाय् नं नेवाः भाय् ब्वंकीगु

किपू- किपू नगरपालिकां नं आः स्थानीय विषय स्थानीय नेवाः भासं हे ब्वंकीगु जूगु दु । उकिया लागिं पाठ्यक्रम व पाठ्यसफू तयार यायेगु ज्या न्ह्यायेधुंकूगु दु । येँ महानगरपालिकां स्थानीय विषय स्थानीय भासं ब्वंकेगु निर्णय यायेधुंकाः आः किपू नगरपालिकां नं स्थानीय भाषा ब्वंकेगु निर्णय याःगु खः ।

किपू नगरपालिकाया मेयर रमेश महर्जनं कनादीकथं किपू नगरपालिकाय् अप्वः वसोवास नेवाःतय्गु दुगु व नेवाः भाय् हे थनया स्थानीय भाय् जूगु कारणं नेवाः भासं हे स्थानीय विषय ब्वंकेगु व्यवस्था यायेत्यनागु खँ कनादिल ।

लिसें वय्कलं नेवाः भाय् ब्वंकेगु ज्या छक्वलं न्ह्याकेत थाकुइ फुगु जुयाः शिक्षक व विद्यार्थीतय्त नेवाः भाय् च्वयेगु व ब्वंकेगु तालिम समेत बीगु थःपिनि ग्वसाः दुगु खँ नं कनादिल ।

किपू नगरपालिकां स्थानीय पाठ्य–क्रम तयार याना तयेधुंकूगु दुसा आः उकियात नेवाः भासं हीकाः उकिया हे आधारय् पाठ्यसपूm तयार यायेगु ज्या नं न्ह्याकेधुंकूगु दु ।

थ्व ज्या न्ह्याकेगु लागिं किपू नपा शिक्षा समितिया दुजःपिं डा. धर्मराज डंगोल, वज्रमुनि वज्राचार्य व जुजुभाइ महर्जनयात जिम्मा बिउगु दु । वय्कःपिंसं येँ महानगरपालिकां तयार यानातःगु पाठ्यसफूया हे ग्वाहालि कयाः किपू नपाया नं सफू च्वयेगु ग्वसाः दुगु खँ कनादिल ।

मेयर महर्जनं कनादीकथं किपूया सामुदायिक स्कूलय् नेपालभाषा ब्वंकेगु लागिं छुं समस्या मदु, निजी स्कूलय् ब्वंकेगु लागिं नं निजी स्कूलतय् संस्था प्याब्सन, एन–प्याब्सनपाखें सहमति बीधुंकूगु दु । मेयर महर्जनं आवश्यक जूसा थ्व पाठ्यसफू छापे यानाः फुक्क हे स्कूलतय्त इना बीगु ग्वसाः दुगु खँ नं कनादिल ।

किपुली निजी व सामुदायिक यानाः ४० गू स्वयां अप्वः स्कुल दुगु खँ उप–मेयर सरस्वती खड्कां कनादिल । स्वनिगःया मेमेगु नपाय् नं नेपाल–भाषां ब्वंकेगु तयारी जुयाच्वंगु दु ।

सम्बन्धित बुखँ

LEAVE YOUR COMMENTS