विकल्प मदुतले सी उइके बीगु

येँ (नेपालभाषा टाइम्स)- येँ मनपा वडा नं. ७ स्थित चाबही दिपया विकल्पय् सरकारं मेगु दिपया व्यवस्था मयाःतले अन सी उइगु ज्याय् मनपां छुं नं कथं हस्तक्षेप मयाइगु जूगु दु । म्हिगः येँ मनपाया सम्पदा विभागय् उगु दिप विवादयात कयाः जूगु सहलहय् मनपाया नगर प्रहरी प्रमुख राजु पाण्डें उगु दिपया विकल्पय् सरकारं मेगु दिपया व्यवस्था याना मबिउतले दिपय् सी उइगु ज्याय् मनपापाखें छुं कथंया हस्तक्षेप मयायेगु खँ कनादीगु खः ।

म्हीग उगु हे लागाया स्थानीय कृष्ण डंगोल मदुगुलिं वय्कःया अन्तिम संस्कार यायेत सिथं हःगु इलय् दिप जःखः लिपा छेँ दनाः च्वं वःपिं पिनेयापिं मनूतय्सं अवरोध याःगु खः । उमिसं दिपय् सी उइके बी मखु धकाः प्रहरी हे पाः तये हःगु खः । लिसें सी उगु पनेगु लागिं मनपाया नगर प्रहरी समेत अन पाः च्वं वःगु खः ।

दिप जःखः छेँ दनाः च्वं वःपिं मनूतय्सं सी उइगु पना बीवं अन मृतकया छेँजःपिंलिसें ताः ई हे कचवं जूगु खः । ताः ईया विवाद लिपा ‘सीम्ह मनूया अन्त्येष्टि यायेगु लाकि मयायेगु’ धइगु न्ह्यसः पिहां वःबलय् पाः च्वं वःपिं प्रहरीत चिला वंगु खः । वयां लिपा बहनी ६ बजे सी उइगु ज्या जूगु खः । अन जबर्जस्ती सी उइगु ज्या यात धकाः उगु लागाय् लिपा छेँ दनाः च्वंवःपिं आप्रवासीतय् आक्रोशित जुसें वडा अध्यक्ष विमल होडायात घेरे याः वंगु खः । वयां लिपा थ्व समस्या बारे सहलह यायेगु धकाः म्हिगः मनपाया ज्याकुथिइ फुक्क पक्ष च्वनाः बैठक च्वनेगु सहमति जूगु खः ।

म्हिगः वडा ७ या अध्यक्ष, सम्पदा समितिया अध्यक्ष आशाकाजी संगत, मनपाय प्रमुख प्रशासकीय अधिकृत समेत च्वनाः बैठक च्वंगु खः । बैठकय् आप्रवासीतय्सं सर्वोच्चं अन सी उइ दइ मखु धकाः आदेश बियातःगु खँ कँसें उकिया पालना यायेमाःगु तर्क तःगु खः । स्थानीयवासीतय्सं दिपया विकल्प ग्व ले सा धकाः न्ह्यसः तयेवं नगर प्रहरी प्रमुख पाण्डें अथे खःसा विकल्प मदुतले अन सी उइ दयेमाः धासें थःपिंसं सी उइगु ज्याय् हस्तक्षेप मयायेगु खँ कनादीगु खः । आप्रवासीतय्सं धाःसा उगु सहमतिइ हस्ताक्षर मयाःगु खः ।