पुलांम्ह उपराष्ट्रपतिया काययाके नं न्यनेकने

येँ (नेपालभाषा टाइम्स)- प्रहरीया केन्द्रीय अनुसन्धान विभागं पुलांम्ह उपराष्ट्रपति नन्दबहादुर पु्नया काय् दिपेश पुनयात नं अनुसन्धानया दायराय् हःगु दु । ६० किलो लुँ प्रकरणय् म्हिगः दिपेश पुनयात सीआईबीं सःताः न्यनेकने याःगु खः । उकथं हे अध्यागमन विभागया महानिर्देशक झलकराम अधिकारीयात नं सीआइबीं न्यनेकने याःगु दु ।

पुन व अध्यागमन विभागया अधिकारीया स्वापू लुँ तस्करीया मू नाइके दावा छिरिङलिसे खने दुगु धासें प्रहरीं अनुसन्धान न्ह्याकूगु खः । बयान लिपा निम्हेसितं माःगु इलय् हानं हाजीर जुइ धकाः भ्वं याकाः त्वःता हःगु खः ।

उकथं हे सीआईबीं भन्सार विभागया कर्मचारीतय्त नं न्यनेकने यानाच्वंगु दु । प्रहरीया कथं आः तक थ्यंमथ्यं सछिम्हेसिके न्यनेकने यायेधुंकूगु दु । उकी मध्ये २७ म्हेसित प्रहरीं ज्वनाः छानविन यानाच्वंगु दु ।