स्वन्हुयंकंया ज्ञानमाला सम्मेलन शुरु

भ्वत (नेपालभाषा टाइम्स)- झिक्वःगु राष्ट्रिय ज्ञानमाला सम्मेलन शनिवाःनिसें थन शुरु जूगु दु । नेपाल राष्ट्रिय ज्ञानमाला समितिया ग्वसालय् वांख्यः ज्ञानमाला भजन खलःया व्यवस्थापन काभे्र जिल्ला क्षेत्रीय उपसमितिया सक्रियताय् उगु सम्मेलन शुरु जूगु खः ।

‘बुद्धया उपदेश अनुशरण याये नु, चित्तयात झीसं परिशुद्ध याये नु’ धइगु नारा बियाः शुरु जूगु स्वन्हुयंकंया सम्मेलनय् देय्न्यंकंया सछि व नीन्यागू ज्ञानमाला भजन खलकं ब्वति कयाच्वंगु दु ।
अखिल नेपाल भिक्षु महासंघया नायः श्रद्धेय भिक्षु फ्राखु विशाल धम्मशोभन महास्थविरं उलेज्या याना बिज्याःगु खः । थ्व स्वयां न्ह्यः सम्मेलनय् ब्वति काये वःपिं दक्वं ज्ञानमाला भजन खलःया प्रतिनिधि व श्रद्धालुसहितं भ्वं देय्या पुलांगु बजाःया ज्ञानमाला शान्ति पदयात्रा याःगु खः । उगु शान्ति पदयात्रा सम्मेलनस्थलय् थ्यनेवं महासंघया अध्यक्ष भिक्षु धम्मशोभन महास्थविरं झण्डोत्तोलन यानाबिज्याःगु खः ।

महासंघया अध्यक्ष भिक्षु धम्मशोभन महास्थविरं सम्मेलनया उलेज्या याना बिज्यासें मन, बचत व कर्मया पर्याय हे शान्ति जूगु खँ धयाबिज्यात । न्हापांगु न्हिया ज्याझ्वलय् बुद्ध विहारया प्रमुख नापं महासंघया पुलांम्ह महासचिव भिक्षु कोण्डन्य महास्थविरं बुद्धया उपदेश अनुशरण याये नु, चित्तयात झीसं परिशुद्ध याये नु विषयय् ज्यापौ न्ह्यब्वया बिज्याःगु खः । उगु ज्यापौयात कयाः ख्वपया पुष्परत्न शाक्यं टिप्पणी यानादीगु खः ।

सम्मेलनय्ब्वति कयाच्वंगु मध्ये ७५ गू भजन खलःपाखें ज्ञानमाला भजन न्ह्यब्वइगु ज्याझ्वः दु । वंगु पुस २३ गते सम्मेलनया उलेज्याकुन्हु नीन्यागू भजन खलःपाखें ज्ञानमाला भजन न्ह्यब्वःगु खःसा पुस २४ गते गोष्ठिलिसें भजन न्ह्यब्वःगु खः । सम्मेलनय् छगू भजन खलःपाखें प्यम्ह प्यम्ह प्रतिनिधि ब्वति कयाच्वंगु दुसा छगू भजन खलःपाखें अप्वलय् झिम्हेसित भजन न्ह्यब्वःगु खः ।

वि.सं. १९९४ क्रुर राणा शासनया इलय् भिक्षु धम्मालोक महास्थविर, भिक्षु अमृतानन्द महास्थविरया कुतलय् दकलय् न्हापां जनस्तरं स्वयम्भू ज्ञानमाला भजन खलः नीस्वनाः ज्ञानमाला भजनया अभियान शुरु याःगु खः । देय्न्यंकं न्यना वनाच्वंगु ज्ञानमाला भजन खलःयात छगू हे थासय् हयाः ज्ञानमाला भजनया सर्वागिंण विकास व विस्तार यायेगु उद्देश्यं वि.सं. २०५१ चैत १८ गते नेपाल राष्ट्रिय ज्ञानमाला समिति नीस्वंगु खः ।

समितिं प्रत्येक स्वदँय् छक्वः राष्ट्रिय सम्मेलन याना वयाच्वंगु दु । स्वन्हयंकंया सम्मेलनया थौं लिपांगु न्हि समापन ज्याझ्वः जू वनाच्वंगु दु । समितिया नायः रमना श्रेष्ठया सभापतित्वय् जूगु सम्मेलनय् काभे्रपलाञ्चोकया सांसदलिसें पुलांम्ह मन्त्री गोकल बाँस्कोटां नं नुगःखँ तयादीगु खः ।