आदिवासी चलचित्र महोत्सव व निफ अवार्डय् जामनः गुभाजु छनोट

येँ – नेपाल आदिवासी जनजाति महासंघ अमेरिकाया ग्वसालय् जुइगु नेपाल आदिवासी चलचित्र महोत्सव व निफ अवार्ड २०२१या निंतिं नेपालभाषाया ऐतिहासिक संकिपा ‘जामनः गुभाजु’ छनोट जूगु दु । अमेरिकाया न्यूयोर्क सहरय् वंगु आइतवाः जूगु छगू ज्याझ्वःया दथुइ महोत्सव व अवार्डया निंतिं संकिपा छनोट याःगु खः ।

जनजाति महासंघ अमेरिकाया ग्वसालय् २८ क्वःगु विश्व आदिवासी जनजाति दिवसया लसताय् लाकाः उगु महोत्सव जुइत्यंगु खः । महोत्सवया निंतिं दुहां वःगु आदिवासी जनजातिया थीथी भाय्या संकिपामध्ये न्हय्गू संकिपा छनोट यायेगु ज्या जूगु चलचित्र छनोट समितिं जानकारी बिउगु दु ।

समितिं बिउगु जानकारीकथं महोत्सव व अवार्डया निंतिं थीथी आदिवासी जनजातिया मांभासं निर्माण जूगु झिंन्यागू संकिपा दुहां वःगु खःसा उकीमध्ये न्हय्गू भाय्या छगू छगू यानाः न्हय्गू संकिपा छनोट यायेगु ज्या जूगु महासंघया महासचिवलिसें महोत्सवया संयोजक नरेन्द्र थापां जानकारी बियादिल । महोत्सवया निंतिं संकिपा ल्ययेत सम्बन्धित भाषाया जातीय संस्थायात हे जिम्मेवारी बियागु नं वय्कलं कनादिल ।

थ्व हे वइगु अगस्ट २१ व २२ तारिखय् जुइगु महोत्सवया निंतिं नेपालभाषाया जामनः गुभाजुलिसें मि न्होर्वै ट (गुरुङ), प्रङना (तामाङ), मेतोक (ह्योल्मो), ट्याङकचालक (मगः), सायाबुङ (राई) व केः (लिम्बु) भाय्या यानाः न्हय्गू संकिपा छनोट जूगु जानकारी न्यूयोर्कस्थित चलचित्र छनोट समितिं जानकारी बिउगु दु ।
अथे हे महोत्सव व अवार्डया निंतिं अन्तिम तयारी नं जुयाच्वंगु ग्वसाः खलकं जानकारी बिउगु दु ।