लुम्बिनी बौद्ध विश्वविद्यालयं स्वन्हुयंकं वार्षिकोत्सव हनीगु

येँ – लुम्बिनी बौद्ध विश्वविद्यालय झिंन्हय्क्वःगु वार्षिकोत्सव स्वन्हुयंकं थीथी ज्याझ्वः यानाः हनीगु जूगु दु । बौद्ध उच्च शिक्षा केन्द्रया रुपय् दुगु विश्वविद्यालय १७ क्यनीगु लसताय् थ्व हे वइगु मंसिर १४ गतेनिसें स्वन्हुयंकं थीथी विशेष ज्याझ्वः यानाः हनेत्यंगु खः ।

विश्वविद्यालययाकथं मंसिर १४ गतेकुन्हु बुद्ध मूर्तिइ प्राण प्रतिष्ठा पुजा ज्याझ्वः याइगु जूगु दुसा उकुन्हु हे ‘शान्ति, समझदारी व दिगो विकासया निंतिं पत्रकारिता’ विषयक छगू कार्यशाला गोष्ठि याइगु जूगु दु ।

अनंलि मंसिर १५ गते न्हापांगु त्रियान प्रज्ञा सम्मेलन याइगु जूगु दुसा उकुन्हु हे राष्ट्र प्रमुख विद्यादेवी भण्डारीं लुम्बिनी बौद्ध विश्वविद्यालय परिसरय् जुइगु वार्षिक उत्सव ज्याझ्वःया उलेज्या लिसें बुद्ध मूर्ति अनावरण, सफू पितब्वज्या नापं विश्वविद्यालययात थीथीकथं ग्वाहालि यानादीपिंत हनेज्या यानादीगु ज्याझ्वः दु ।

थुकथं हे विश्वविद्यालयया वार्षिकोत्सवया लसताय् हिदान ज्याझ्व, दीप प्रज्ज्वलन, साइकल ¥याली, नुगःचुया ल्वय् सम्बन्धी क्लिनिकया उलेज्या यायेगु ज्याझ्वः दुगु विश्वविद्यालयं जानकारी बिउगु दु ।