पत्रकार महासंघया सफूयात कयाः विमोचन ज्याझ्वलय् हे विरोध

येँ (नेपालभाषा टाइम्स)- नेपाल पत्रकार महासंघया नेतृत्व याःपिं अध्यक्षपिनि जीवनीयात कयाः च्वयातःगु सफू विमोचन ज्याझ्वः हे घाराघुरु जूगु दु । घाराघुरुया दथुइ विमोचन यायेत्यंगु ‘अग्र अनुहार ः कथा अग्रजको, गाथा महासंघको’ नांया सफू लाकाकयाः खुनाबिउगु खः । नेपाल आदिवासी जनजाति पत्रकार महासंघ (फोनिज) व नेवाः पत्रकार राष्ट्रिय दबुलिं थुगु सफूया विरोध यासें विमोचन याके मबिउगु खः । सफुलिइ पत्रकार महासंघया संस्थापक अध्यक्षया बारे गलत व्याख्या यानातःगु धासें विरोध याःगु खः ।

पत्रकार महासंघया प्रतिष्ठान प्रदेश शाखां पिकाःगु थुगु सफुलिइ पत्रकार संघ वि.सं. २०१२ साल गठन जूगु न्ह्यथँसें उबलय्या अध्यक्ष कृष्णप्रसाद भट्टराई निसें आःतकया अध्यक्षतय् जीवनी न्ह्यथनातःगु खः । तर पत्रकार संघया स्थापना २००८ सालय् हे सत्यनारायण बहादुर श्रेष्ठं यायेधुंकूगु खः । महासंघं श्रेष्ठयात छखे लाकाः भट्टराईयात संस्थापक अध्यक्ष नाला वयाच्वंगु दु ।

थुकियात कयाः नेवाः पत्रकार राष्ट्रिय दबू व फोनिजं तःक्वः हे महासंघय् ज्ञापनपत्र बियाः श्रेष्ठयात संस्थापक अध्यक्ष कायम यायेत माग यायेधुंकूगु दु । अथे खःसां महासंघं अटेरी जुयाः इतिहास हे स्यंकेगु कुतः याःगु धासें सफू व महासंघया विरोध जूगु खः ।

पयर्टन बोर्डय् आइतवाः जूगु विमोचन ज्याझ्वलय् महासंघया पुलांपिं अध्यक्षपिंसं सफू विमोचन यायेत्यंगु इलय् हे फोनिज व दबूया दुजःपिं दबुलिइ हे थहां वनाः विरोध याःगु खः । थ्व झ्वलय् विमोचन जुइत्यंगु सफू हे लाका कयाः अन हे खुनाबिउगु खः । लिसें अन हे ‘इतिहास स्यंकेगु कुतः याये दइमखु’, ‘सत्यनारायण बहादुर श्रेष्ठयात महासंघया संस्थापक अध्यक्ष कायम या’ धकाः नारा थ्वयेकूगु खः । थ्व झ्वलय् विरोध याःपिंसं सत्यनारायण बहादुर श्रेष्ठया किपा सहित वय्कःयात संस्थापक अध्यक्ष कायम यायेत माग यानाः पर्चा नं ब्वःगु खः ।

विरोधया झ्वलय् न्ववासें फोनिजया महासचिव मिलन लिम्बुं महासंघं थःपिनिगु मागयात बेवास्ता यासें सिइक चायेकं सफू पिथनाः सत्यनारायण बहादुर श्रेष्ठया इतिहासयात हे हुइगु कुतः याःगु खँ धयादिल । थःपिंसं तःन्हु न्ह्यवनिसें थ्व बारे महासंघयात सचेत यासें वार्ताय् च्वनागु खःसां थुकियात बेवास्ता यासें सफू पिथनेगु कुतः याःगुलिं थःपिं थथे विरोधय् कुहां वयेमाःगु खँ धयादिल । वय्कलं महासंघं आः २४ घौ दुने थुकियात सच्चे मयात धाःसा फोनिजं देय् न्यंकं महासंघया विरोधय् आन्दोलन न्ह्याकी धयादिल ।

अथेहे पत्रकार दबूया महासचिव केके मानन्धरं ‘नेपाल टुडे’ सत्यनारायण बहादुर श्रेष्ठं वि.सं. २००८ य् हे पत्रकारतय् हक हितया निंतिं पत्रकारतय्त संगठीत यानाः नेपाल पत्रकार संघ नीस्वंगु खँ न्ह्यथँसें थ्वयां प्यदँ लिपा २०१२ सालय् थ्व हे संघयात पुनर्गठन याःम्ह कृष्णप्रसाद भट्टराईयात संस्थापक नालाः पत्रकार महासंघं श्रेष्ठप्रति अन्याय यानाच्वंगु व इतिहासयात हे नामेत यायेगु कुतः यानाच्वंगु खँ धयादिल ।

सफू विमोचनया निंतिं मू पाहाँ कथं प्रतिनिधि सभाया सभामुख देवराज घिमिरे व पाहाँ कथं सञ्चारमन्त्री रेखा शर्मायात सःतातःगु खःसा थुगु सफूयात कयाः फोनिज व पत्रकार दबुलिं विरोध यायेत्यंगु सियाः वय्कःपिं धाःसा ज्याझ्वलय् मवःगु खः ।

विमोचन जुइ न्ह्यः ज्याझ्वलय् न्ववासें महासंघया अध्यक्ष विपुल पोखरेल, पुलांपिं अध्यक्ष किशोर नेपाल, हरिहरि विरहीपिंसं नं महासंघया संस्थापक श्रेष्ठ हे जूगु स्वीकार यासें सफू संशोधन यायेमाःगु खँ धाःगु खः । महासंघया अध्यक्ष पोखरेलं श्रेष्ठया नामं महासंघ सिरपाः स्वनेगु खँ नं धाःगु खः ।