बिमस्टेकय् थःथःगु हे देय्या भासं सम्बोधन, बौद्ध मंकाः संस्कार न्ह्यःने यंकेगु भारतया प्रस्ताव

येँ  बहुक्षेत्रीय प्राविधिक तथा आर्थिक सहयोगया निंतिं बंगालया खाडी राष्ट्रतय् कुतः (बिमस्टेक) या प्यक्वःगु शिखर सम्मेलन म्हिगः नेपाःया प्रधानमन्त्री केपी ओलीया अध्यक्षताय् जुल ।

म्हिगः जूगु शिखर सम्मेलनय् नेपाः, बंगलादेश व भूटान बाहेक मेगु फुक्क हे देय्या सरकार प्रमुखतय्सं थःथःगु हे देय्या प्रमुख भासं सम्बोधन यानादीगु खः । भारतीय प्रधानमन्त्री नरेन्द्र मोदीं हिन्दी, म्यान्मारया राष्ट्रपति ऊ मिन्टं वर्मी भासं, श्रीलंकाया प्रधानमन्त्री मित्रसेरा सिरिसेनां सिंहली भासं व थाइल्याण्डया प्रधानमन्त्री प्रयुद चाङयुचाङं थाई भासं हे संवोधन यानादीगु खः ।

सम्मेलनयात सम्बोधन यासें भारतीय प्रधानमन्त्री नरेन्द्र मोदीं बिमस्टेक संगठनयात बल्लाकेगु लागिं थीथी कथंया प्रस्ताव न्ह्यःने तयादिल । वय्कलं आतंकवाद विरुद्ध ल्वायेगु लागिं मेगु महिनाय् भारतय् जुइगु सैनिक अधिकारीतय्गु सम्मेलनय् ब्वति कायेत बिमस्टेक देय्तय्त ब्वनादिलसा थ्व संगठनया मंकाः संस्कृति कथं बौद्ध संस्कृतियात न्ह्यःने यंकेमाःगु खँय् नं बः बियादिल । नेपाःया प्रधानमन्त्री केपी ओलीं सार्क व बिमस्टेक वैकल्पिक मखु बरु परिपूरक संस्था खः धयादिल । भूटानया प्रधानमन्त्रीं समृद्धि मूल्य मान्यताय् आधारित जुइमाः धयादिल ।

सम्बन्धित बुखँ

LEAVE YOUR COMMENTS