ने. सं. ११४६ बछलाथ्व चौथी - बुंगद्यः सालिगु

स्वयम्भूइ आन्दोलनया नारा

येँ – गुंलाया स्वयम्भू महाचैत्य अथें नं भीड जुइगु ई । थ्व भीडया दथुइ नं थौंकन्हय् स्वयम्भू जःखः धाःसा न्हापा गबलें खने मदु कथंया दृश्यत खने दयाच्वंगु दु । स्वयम्भूया थीथी थासय् थौंकन्हय् थीथी कथंया आन्दोलनया नारा च्वयातःगु हाकुगु ब्यानरत ब्वया तःगु खने दइ ।

स्वयम्भूया छेँखाय् जक मखु अन गुंला बाजं थाना वःपिनिगु धाः बाजनय् तकं अज्याःगु नारा च्वयातःगु खनेदु । उलि जक मखु गनं गनं अनया चीभाः व खास यानाः गं पतिकं अज्याःगु नारा च्वयातःगु हाकुगु ब्यानर तयातःगु दु । स्वनिगःयात नेवाः सांस्कृतिक स्वायत्त लागा घोषणा याकेत न्ह्यानाच्वंगु आन्दोलनया प्रचार यायेगु ताः तयाः अन थज्याःगु नारात च्वयातःगु खः ।

आन्दोलनकारीतय्सं नेवाःतय् सांस्कृतिक पर्व गुंलायात लक्षित यासें थ्व पलाः न्ह्याकूगु खः ।थुकी अन थीथी त्वालं धाः बाजं थानाः वइपिंसं थःथःपिनि बाजंया न्ह्यःने ‘स्वनिगःयात नेवाः सांस्कृतिक स्वायत्त घोषणा या’, ‘गुथि विधेयक खारेज या’ आदि च्वयातःगु चिचीपाःगु ब्यानरत यखानातःगु खःसा गं दुथाय् धाःसा ६.३० बजे गं थायेगु ज्याझ्वः दुगुलिं सहभागी जुयादिसँ धकाः च्वयातःगु दु ।

ज्याझ्वः कथं सुथय् ६.३० बजे जुइवं स्वयम्भूया थीथी थासय् च्वंगु गं थायेगु याइ । छखे गं थानाच्वनीगु इलय् मेखे हारतिमांया थाय् पुजा बीगु ज्या नं यायेगु ज्याझ्वः दयेकातःगु दु । तर गुंला पर्वय् स्वयम्भूइ तसकं भीड जुइगु व बाजं पुचःत सकलें थःथःगु हे ज्याय् व्यस्त जुइगु जुयाः अन जुयाच्वंगु आन्दोलनया ज्याझ्वःत धाःसा व्यवस्थित रुपं न्ह्यानाच्वंगु खने मदु ।

गुरुजुपिंसं थाइगु गं नं निरन्तर थ्वयाच्वनीगु बाजंया भीडय् ताये उलि ताये मदु ।छुं नं जातिया बाहुल्यता दुगु विशेष लागायात सांस्कृतिक स्वायत्त क्षेत्रया रुपय् मान्यता बी फइगु खँ वर्तमान संविधानय् व्यवस्था यानातःगु दु । तर सरकारं संविधानय् व्यवस्था यानातःगु थ्व अधिकार नं प्रदान मयाः ।

आः नकतिनि सर्वोच्च अदालतं बराम जातियात संविधानय् याना तःगु थ्व व्यवस्था कथं विशेष स्वायत्त क्षेत्र घोषणा यायेगु अधिकार प्रदान याःगुलिं आः नेवाः जातियात नं अज्याःगु अधिकार बी माःगु माग यासें थुगु आन्दोलन न्ह्याकागु खँ सम्बद्ध आन्दोलनकारीतय्सं धाःगु दु ।