यल महानगरयात फोग मेशिन ग्वाहालि

यल- यल महानगरपालिकायात अत्याधुनिक फोग मेशिन ग्वाहालि बिउगु दु । यल महानगरयात प्लेइङ फर चेञ्ज नेपाल फाउण्डेसनं अत्याधुनिक फोग मेशिन निगः ग्वाहालिकथं लःल्हाःगु खः ।
यल मनपापाखें संचालन जुयाच्वंगु निगू आइसोलेसन सेन्टरया निंतिं फाउण्डेसनं उगु मेशिन ग्वाहालि याःगु खः । मेशिन लःल्हायेगु ज्याझ्वः लिपा यल महानगरपालिकाया प्रमुख चिरिबाबु महर्जनं कोरोना

संक्रमणया कारणं ब्वलनाच्वंगु महामारीया थुगु इलय् महानगरया ज्याय् ग्वाहालि यायेकथं हौसला बियादीगुलिं सुभाय् देछासे महानगरयात प्राप्त फोग मेशिनपाखें कोरोना निःसंक्रमण यायेत ग्वाहालि जुइगु विश्वास प्वंकादिल ।

लिसें वय्कलं यल महानगर दुने जक कोरोना संक्रमणया कारणं आतक ११९ म्ह सीधुंकूगु जानकारी बियादिसें महानगरपालिकां कोरोना संक्रमणपाखें सीपिं, उपचार जुयाच्वंपिं व आइसोलेसनय् च्वनाच्वंपिंत महानगरपालिकां आर्थिक ग्वाहालिया घोषणा यायेधुंगु व आm थुकियात निंतिं आवश्यक मापदण्ड दयेकाः याकनं कार्यान्वयन यायेगु जुइ धयादिल ।

फाउण्डेसनया अध्यक्ष ईश्वर वज्राचार्यं महामारीया इलय् आइसोलेसन मदयाः संक्रमिततय्सं फये मालाच्वंगु् समस्यायात ध्यानय् तयाः महानगरपालिकां आइसोलेसन संचालन यानाः च्वछायेबहगु ज्या याःगु व उकी थःपिंसं नं ग्वाहालि याये खंगुलिं लसता प्वंकादिल ।

संस्थाया सल्लाहकार विसन्तर शाक्यं थुकथंया मेशिन थ्व स्वयां न्ह्यः १६ वडायात नं ग्वाहालि यायेधुंगु जानकारी बियादिसें कोरोना संक्रमण पनेत स्यानिटाइज यायेमाःगु अतिकं आवश्यक जू धासें चीनय् निर्माण जूगु थुकथंया मेशिन न्हापांखुसी नेपालय् स्यानिटाइज यायेत ग्वाहालि याये खंगुलिं लसता प्वंकादिल ।

फाउण्डेसनपाखें प्राप्त उगु मेशिन ज्यापु समाजया वृद्धाश्रम व ख्वनाय् संचालन जुयाच्वंगु आइसोलेसन केन्द्रयात लःल्हाःगु खः ।

सम्बन्धित बुखँ

LEAVE YOUR COMMENTS