भारतय् अलपत्र जुयाच्वंपिं न्हयम्ह नेपाःमि मस्तय् उद्धार

दरभंगा÷नेपालं बिसिउँ वनाः भारतय् अलपत्र लानाच्वंपिं न्हय्म्ह मस्तय्त बिहीवाः उद्धार याःगु दु । शुक्रवाः मेपिं खुम्ह मस्तय् उद्धार यानाः उकुन्हु हे नेपाः थ्यंके हयेत्यंगु दु । उद्धार याःपिं न्हय्म्ह मस्त मध्ये प्यम्ह मिजं मचा खःसा स्वम्ह मिसा मचा खः । भारत बिहार राज्यया छपराय् च्वंगु बाल गृहं प्यम्ह मिजं मस्तय्त व मुजफ्फरपुरय् च्वंगु बालिका गृहं स्वम्ह मिसा मस्तय्त उद्धार याःगु खः । नेपाःया गैरसरकारी संस्था छोराछोरी नेपाःपाखें वंगु छगू पुचलं उमित उद्धार याःगु खः ।

दरभंगाया बालगृहं मस्त लित बीत तसकं झमेला याःगुलिं मस्त लितहयेत तसकं थाकुगु खँ उद्धार पुचःया नेतृ व छोराछोरी नेपालया कार्यकारी निर्देशक शैलजा सिएमं धयादीगु दु । मय्जु शैलजा लिसें छोराछोरी नेपालया कार्यक्रम संयोजक अनिला डंगोल व नेपालभाषा टाइम्सया तेज महर्जनया पुचलं उमिगु उद्धार याःगु खः ।

दरभंगाया बाल कल्याण समिती पटनाया बाल संरक्षण अधिकारी इमेल थःगु नामय् छ्वया महःगु त्वह तयाः मस्त लित छ्वयेत अस्वीकार याःगु खः । उद्धार याःपिं मध्ये प्यम्ह मिजं मस्त हरिवन सर्लाहीया खःसा मिसामस्त मध्ये छम्ह वीरगंज घण्टाघरया, छम्ह रौतहतया छम्ह सप्तरीया खः ।


उद्धार याःपिं मध्ये प्यम्ह मिजंमस्त दिल्ली ज्या याः वनेगु धकाः छेँ नं बिसिउँवंपिं खःसा, छम्ह मिसा जनकपुर वंबलय् तंम्ह खः । अथेहे मेम्हेसित मांअबु व परिवार मिं नयाः मदयेवं नापं छेँय् आश्रय बिउम्हेस्यां हे भारतय मियाहःगु खः ।

छपरां लितहःपिं झिंछदँ, झिंनिदँ, झिंस्वदँ व झिंन्यादँ दुपिं मिजंमस्त खः । उमिसं थःपिं दिल्लीइ ज्या याःवनेगु धकाः छेँ नं बिसिउँ वनागु खँ धाःगु दु । सर्लाहीया हरिवनं म्हतिं न्यासः न्यासः ध्यबा ज्वनाः वंगु चैत ३ गते छेँ नं बिसिउँ वनागु खँ उमिसं कंगु दु । बीरगन्जया रक्सौल, दरभंगा जुयाः वनाच्वंगु इलय् उमित छपराय् रेल्वे प्रहरीं ज्वनाः बाल गृहय् तयेयंकूगु खः ।

उद्धार याःपिं मिसा मस्त ९ दँयापिं निम्ह व ११ दँया छम्ह दु । आः उद्धार यानाहःपिंत छोराछोरी नेपालया सेल्टरय् तयाः परामर्श बीगु व वयां लिपा स्वास्थ्य जाँच यानाः मां अबुपिंत लःल्हायेगु खँ छोराछोरी नेपालया कार्यक्रम संयोजक अनिला डंगोलं धयादीगु दु ।

सम्बन्धित बुखँ

LEAVE YOUR COMMENTS