आनन्द भुवन विहार पुनःनिर्माण याइगु
येँ- स्वयम्भू धिमेल्वहंस्थित आनन्दभुवन विहार पुनःनिर्माण जुइगु जूगु दु । २०७२ साल बैशाख १२ गतेया तःभुखाचं क्षतिग्रस्त जूगु विहार पुनःनिर्माणया निंतिं जग स्वनेगु ज्या जूगु दु ।
येँ महानगरपालिकाया प्रमुख विद्यासुन्दर शाक्यं विहार पुनःनिर्माणया निंतिं बौद्ध परम्पराकथं जग स्वनेगु ज्या यानादीगु खः । उगु इलय् येँ मनपा प्रमुख शाक्यं महानगर दुनेया मूर्त, अमूर्त सम्पदा संरक्षण व उकियात ल्यकेगु नीतिकथं हे महानगरं ज्या याना वयाच्वंगु धासें सम्पदा संरक्षण सम्बन्धी न्ह्याथेंज्याःगु योजनायात नं थःपिंसं उच्च प्राथमिकता बियाः कार्यान्वयन याना वयाच्वनागु दु धयादिल ।
‘हालय् जक अस्थिधातु दुगु रामग्राम नगरलिसे येँ मनपां भगिनी सम्बन्ध स्थापना यायेगु ज्या जुल । थ्व धइगु धार्मिक व सांस्कृतिक सम्बन्धया आधार निर्माण यायेगु खः । अथे हे लुम्बिनीइ नं नेपाली विहार निर्माणया निंतिं ग्वाहालि यानागु दुसा थ्व मेगु कुतः खः’ प्रमुख शाक्यं धयादिल ।
येँ क्षेत्र नं. ८या संघीय सांसद जीवनराम श्रेष्ठं येँया ज्वःमदुगु सांस्कृतिक पहिचानयात ल्यंकेगु महानगरया प्रमुख जिम्मेवारी खः धासें थौं येँ महानगरं गुगु ज्या यानाच्वन, उकिया निंतिं येँ मनपायात सुभाय् देछासे वयागु ज्यायात कयाः च्वछाया च्वना धयादिल ।
येँ मनपा १५ वडाअध्यक्ष नापं येँ मनपाया प्रवक्ता ईश्वरमान डंगोलं भौतिक पूर्वाधार, सुचुकुचु, सांस्कृतिक सम्पदाया संरक्षणया निंतिं वडा ज्याकूपाखें ८० गू करोड स्वयां अप्वःया योजना संचालन यायेधुंगु जानकारी बियादिल ।
अखिल नेपाल भिक्षु महासंघया महासचिव भिक्षु कोण्डन्य महास्थविरं रामग्राम नगर व लुम्बिनी क्षेत्रतक ग्वाहालि यायेगु ज्या गुगु जुल, उकिं बुद्ध शिक्षा प्रवद्र्धनया निंतिं तःधंगु ग्वाहालि जुइगु विश्वास प्वंकाबिज्याःगु खः ।
विहारया महासचिव बृद्धिमान शाक्यं प्यंगू करोड नीन्यागू लाख लागतय् पुनःनिर्माण जुइत्यंगु विहारया निंतिं ८५ प्रतिशत महानगरपाखें ग्वाहालि प्राप्त जुइगु व ल्यं दुगु १५ प्रतिशत उपासक उपासिका व अन्य स्रोतपाखें चूलाकेगु जानकारी बियादिल ।
ज्याझ्वः विहार प्रमुख भिक्षु शान्तसिद्धार्थया सभापतित्वय् जूगु खःसा उगु इलय् विहारया धम्मानुशासक भिक्षु धर्ममूर्ति महास्थविर लगायतया उपस्थिति दुगु खः ।
LEAVE YOUR COMMENTS