कोरोना संक्रमणया संवेदनशीलता मनन यायेत पत्रकार दबूया इनाप

येँ – नेवाः पत्रकार राष्ट्रिय दबूपाखें कोरोना संक्रमणया भय दुगु थुगु ईया संवेदनशीलता मनन यायेत फुक्क पत्रकारपिंत इनाप याःगु दु ।

पत्रकार दबूया मू छ्याँञ्जे सुनिल महर्जनं आइतवाः छगू विज्ञप्ति पिथनादिसें आःया ईया संवेदनशीलताया चिउताः मतःसें पिदंगु बुखँया हुनिं नेवाःतय् दथुइ लुगू असन्तुष्टि, उकीया विरोध व पिदंगु विज्ञप्ति प्रति ध्यानाकर्षण जूगु खँ न्ह्यथंगु दु ।

‘राज्यया प्यंगूगु अगंया मान सुं सुं पत्रकार व गलत मनसायं वःगु समाचारया हुनिं समाजय् असन्तुष्टि ब्वलंगु व संचार ख्यलय् हाथ्या ब्वलंगु न्हूगु खँ मखु ।’, विज्ञप्तिइ न्ह्यथनातःगु दु, ‘थजाःगु आपालं घटनां झीत स्यंगु पाठपाखें ज्ञां कासें पत्रकारया च्वसा समाजया सकारात्मक रुपान्तरणय् केन्द्रीत जुइमा धइगु भलसा कये ।’

अथेहे विज्ञप्तिइ कोरोनानापया संघर्षय् अझ सशक्त जुइमाःगु पत्रकारया च्वसा सुं व्यक्ति, थाय् व समुदायप्रति लक्षित जुयाः भ्रम ब्वलंकीगु तथ्य दुथ्याकाः पिदंगु बुखँपाखें अझ दुःख तनाब्यूगु खँ धाःगु दु ।

प्रेस काउन्सिलं तकं वंगु २०७७ वैशाख २ गते विज्ञप्ति पिथनाः पत्रकार आचारसंहिता, २०७३ (न्हापांगु संशोधन, २०७६) या ५(२) य् ‘पत्रकार व सञ्चारमाध्यमं जातीय, लैङ्गिक, धार्मिक, क्षेत्रीय, भाषिक, राजनीतिक आस्था, वर्ण बाय् शारीरिक, मानसिक व स्वास्थ्य अवस्था थें जाःगुया आधारय् सुइत नं भेदभाव वा मयःया ब्यवहार (घृणा लुइगु) समाचार सामग्री उत्पादन, प्रकाशन, प्रसारण व वितरण यायेमज्यू’ धकाः पत्रकारहरुपिंत लुमंकाः बीमाःगुपाखे नं थःपिनिगु ध्यानाकर्षण जूगु खँ पत्रकार दबुं विज्ञप्तिइ न्ह्यथंगु दु ।