स्वास्थ्य प्रवद्र्धन केन्द्र हे बीमाया प्रथम सेवा विन्दु
येँ (नेपालभाषा टाइम्स)- येँ महानगरपालिकां स्वास्थ्य बीमा कार्यक्रम लागू यायेत २४ गू वडा सहरी स्वास्थ्य प्रवद्र्धन केन्द्रयात न्हापांगु सेवा विन्दू तोके याःगु दु । महानगरया स्वास्थ्य विभागया प्रमुख रामप्रसाद पौडेलं महानगरं वडा कार्यालयय् दुगु सहरी स्वास्थ्य प्रवद्र्धन केन्द्रयात प्रथम सेवा विन्दू तोके यानागु खँ धयादीगु दु ।
महानगरपालिकाया ३२ गू वडा मध्ये थौंकन्हय् २४ गू वडाय् सहरी स्वास्थ्य प्रवद्र्धन केन्द्र चायेकेधुंकूगु दु । पौडेलं ल्यं दनिगु वडाय् स्वलाया दुने फुक्क तयारी पूवनीगु खँ धयादीगु दु । वय्कलं महानगरपालिका दुने लाःगु वीर अस्पताल, टिचिङ अस्पताल, शुक्रराज ट्रपिकल तथा सरुवा रोग अस्पतालं प्रथम सेवा विन्दू जुइत अस्वीकार याःगुलिं वडाय् दुने च्वंगु स्वास्थ्य केन्द्रयात हे सेवा विन्दू तोके यानागु खँ धयादीगु दु । प्रथम सेवाविन्दूपाखें उपचार यायेधुंकाः केन्द्रीय अस्पतालय् रिफर यायेदइगु खँ वय्कलं धयादीगु दु ।
महानगरपालिका व स्वास्थ्य बीमा बोर्ड दथुइ स्वास्थ्य बीमा कार्यक्रम न्ह्याकेत सहमति जुइधुंकूगु दु । पौडेलया कथं आः ३२ गुलिं वडाय् स्वास्थ्य बीमा सहजकर्ता छनोट याइ । छनोट याःपिं सहजकर्तातय्त बोर्डं थ्वहे पुस दुने तालिम बी । तालिम लिपा स्वास्थ्य बीमा सहजकर्तात छेँ छेँय् वनाः बिमाः याकःवनी । बीमित जूगु स्वला लिपा बीमितं बिमा कार्यक्रम मार्फात् उपचार सेवा कायेखनी ।
सरकारं २०७२ सालय् स्वास्थ्य बीमा कार्यक्रम संचालनय् हःगु खः । थ्व कार्यक्रमय ७४ लाखम्ह बीमित जुइधुंकूगु दुसा थौंकन्हय् ४७ लाख म्ह जक सक्रिय बीमित दु । थ्व बीमा अन्तर्गत बीमित परिवारया सुं बिरामी जुल धाःसा छगू लाख तका बराबरया निःशुल्क उपचार सेवा कायेखनी । थ्व योजना कथं छम्ह निसें न्याम्ह दुजः दुगु परिवारं दँय् स्वद्वः व न्यासः तका व न्याम्ह स्वयां अप्वः दुगु परिवारं छम्ह थप जुलकि न्हय्सः दां थप पुलेमाली ।
LEAVE YOUR COMMENTS