विद्युतीय बसयात रुट मदुनि

येँ – वंगु मंगलवाःनिसें संचालनय् वःगु विद्युतीय बस गन गन संचालन यायेगु धइगु बारे छुं ठोस निर्णय याये फुगु मदुनि । साझा यातायात व लुम्बिनी विकास कोषया मंकाः सहकार्यय् स्वनिगलय् विद्युतीय बस सेवा संचालनय् हःगु खः। प्रधानमन्त्री केपी शर्मा ओली उलेज्या यानादीगु विद्युतीय बस गुगु रुटय् चले यायेगु धइगु बारे धाःसा छुं निर्णय जूगु मदुनि ।

बस व्यस्थापनया जिम्मा कयातःगु साझां याकनं हे बस दर्ता यानाः रुट नं क्वःछीगु धाःगु दु । वइगु छुं दिंया दुने बस दर्ता यायेगु व दर्ता यायेधुंकाः गन आवश्यक जू धइगु थासय् स्वयाः व हे रुटय् बस संचालन यायेगु साझाया व्यवस्थापक महेन्द्रराज पाण्डें कनादिल ।
एशियाली विकास बैंकं लुम्बिनी विकास कोषयात न्यागः विद्युतीय बस अनुदानय् बिउगु खः ।

व्यवस्थापनया जिम्मा धाःसा साझां काःगु खः । उगु बस स्वनिगःया नगर क्षेत्रय् बस संचालन यायेगु योजना दयेकातःगु दु । तर गुगु रुटय् संचालन यायेगु धइगु खँय् छुं नं निर्णय याःगु धाःसा मदुनि । बैंकं अनुदानय् बिउगु बस आःया निंतिं स्वनिगलय् संचालन याःसां लिपा लुम्बिनीइ गौतमबुद्ध अन्तर्राष्ट्रिय विमानस्थल निर्माण लिपा उगु बस लुम्बिनीइ यंकी ।