आदिवासीया ज्ञान व सीप संरक्षण यायेगु बचं

येँ (नेपालभाषा टाइम्स)- प्रधान मन्त्री पुष्पकमल दाहालं आदिवासी जनजातिया ज्ञान व सीप संरक्षण लिसें प्रवद्र्धन यानाः राष्ट्रिय आय थकायेत पहल यायेगु खँ धयादीगु दु । आदिवासी जनजाति आयोगया स्वक्वःगु स्थापना दिवसय् म्हिगः येँय् जूगु ज्याझ्वलय् न्ववासें वय्कलं उगु खँ धयादीगु खः ।

ज्याझ्वलय् न्ववासें प्रधानमन्त्री दाहालं आदिवासी जनजातिया सांस्कृतिक सम्पदायात युनेस्कोया अभिलेखन लिसें आदिवासी जनजातिया अन्तर्राष्ट्रिय श्रम सम्बन्धी महासन्धी कार्यान्वयन यायेगु नितिं सरकारं फयांफछि कुतः यायेगु खँ नं धयादीगु दु ।

आदिवासी जनजाति आयोगय् साधन स्रोतया म्हो जूगु, ऐनय् व्यवस्था जू कथं प्रादेशिक ज्याकू स्थापनाय् लिबानाच्वंगु बारे थम्हं सिउ धासें प्रधानमन्त्री दाहालं जनसंख्याया अनुपातय् नीति निर्माण यायेगु तहलय् आदिवासी जनजातिया प्रतिनिधित्व जुइ मखुगु विषयसं नेपाल सरकारपाखें माःगु ज्या न्ह्याकेगु खँ नं धयादीगु दु ।

प्रधानमन्त्री दाहालं आदिवासी जनजाति समुदाययात तत्कालीन राज्यसत्तां याःगु विभेद व उत्पीडनया विरुद्ध आदिवासी जनजातिं समुदायं थःगु म्हसीका व प्रतिनिधित्वया निंतिं याःगु संघर्ष व बलिदानया लिच्वः कथं आदिवासी जनजाति आयोगया व्यवस्था जूगु खँ नं न्ह्यथनादिल ।

वय्कलं चूलाःगु उपलब्धी सामान्य मेहनत व संघर्षं वःगु मखु धासें सामन्ती व एकात्मक सत्तां थीथी वर्ग, जाति, क्षेत्र, लिङ व समुादाययात याःगु दमन व उत्पीडिनया विरुद्ध द्वलंद्वः योद्धाया हि चःतिं हे थौंया उपलब्धी वःगु खँ नं धयादीगु दु ।