वेइया नेपाः भ्रमणं चीन उत्साहित

भ्रमणपाखें चीन विरोधी भारतीयतय्त लिसः बिउगु दावी

येँ (नेपालभाषा टाइम्स) – चिनियाँ रक्षा मन्त्री लिसें स्टेट काउन्सिलर वेइ फेंगीं नकतिनि यानादीगु नेपाः भ्रमणं चीन विरोधी भारतीय विज्ञतय्त लिसः जूगु खँ चिनियाँ संस्थापन पक्षं धाःगु दु ।  चिनियाँ संस्थापन पक्षया बिचाः पित बीगु अनया सञ्चार माध्यम ‘ग्लोबल टाइम्स’ य् थ्व खँ पिदंगु खः ।

चिनियाँ रक्षा मन्त्री वेइ फेंगी नेपाःया भ्रमण क्वचायेकाः पाकिस्तान भ्रमणय् वंगु खः । पाकिस्तानय् नं फेंगीं अनया राष्ट्रपति अरिफ अल्भि व प्रधानमन्त्री इमरान खानयात नापलानाः चीन-पाकिस्तान आर्थिक व रक्षा सम्बन्धी सम्झौता याःगु खः । अथे हे पाकिस्तानी सेनाया सेनापति कमार जावेद बाजवायात नं नापलानादीगु खः । चिनियाँ रक्षा मन्त्रीं नेपालय् नं राष्ट्रपति, प्रधानमन्त्री व प्रधान सेनापतियात नापलानादीगु खः ।

‘ग्लोबल टाइम्स’ य् न्ह्यथनातः कथं नेपाः व पाकिस्तान निगुलिं देय् लिसे भारतया सीमा विवाद दुगु जुयाः वेइया भ्रमणयात भारतं सतिक च्वनाः निगरानी यानाच्वंगु दु । वेइया थ्व भ्रमणं पाकिस्तान व नेपाःलिसे कायम जुयाच्वंगु थःपिनि सीमा विवाद अझ तच्वइगु खः लाकि धइगु चिउताः भारतं तयाच्वंगु खँ नं समाचारय् धयातःगु दु ।

लुमंकेबहः जू, नेपालं लिम्पियाधुराय् थःगु अधिकार दावी याःबलय् भारतीय सञ्चार माध्यमतय्सं चीनया बः कयाः नेपालं अज्याःगु दावी याःगु खः धकाः द्वपं बियाहःगु खः । चीनया जिन्ह्वा विश्वविद्यालयया निर्देशक सियान फेङं चीन छगू प्रमुख राष्ट्र जूगु कारणं नेपाः व पाकिस्तान थेंज्याःगु जःलाखःला देय्यात ग्वाहालि यायेगु चीनया कर्तव्य खः धयादीगु दु । खास यानाः कोरोना महामारीया कारणं यानाः नं थः जःलाखःला देय्तलिसे स्वापू बांलाका वने माःगु बाध्यता चीनयात दुगु खँ नं निर्देशक फेङं धयादीगु दु । फेङं धयादी, ‘कोरोना महामारीया इलय् जःलाखःला देय्तय्त ग्वाहालि यायेमाःगु चीनया दायित्व दु । जःलाखःला देय्यात ग्वाहालि यायेगुया अर्थ थःत हे ग्वाहालि यायेगु खः ।’

जःलाखःलालिसे स्वापू बांलाकेगु नं चिनियाँ कुटनीतिया प्रमुख अंग खः । थुकिया हे छगू अंग कथं छुं ई न्ह्यः तिनि चिनियाँ विदेशमन्त्रीं रुस, कजाखस्तान, किर्गिस्तान व मंगोलिया भ्रमण याःगु खःसा वंगु सेप्टेम्बरय् कम्बोडिया, मलेशिया, लाओस व थाइल्याण्ड भ्रमण याःगु खः ।

थ्वहे झ्वलय् बीबीसी नेपाली सेवां चिनियाँ रक्षा मन्त्रीया थ्व भ्रमणं चीन नं नेपाःलिसे अमेरिका व भारतया थेंज्याःगु हे सम्बन्ध दयेकेत चाहे जुयाच्वंगु खँ न्ह्यथंगु दु । नेपाली सेनालिसे अमेरिका व भारतीय सेनाया विशेष कथंया स्वापू दु । आः चीनं नं नेपाली सेनालिसे अज्याःगु हे स्वापू दयेकेत स्वयाच्वंगु दु । उकिया लागिं हे चीनं थुकथंया भ्रमण यानाच्वंगु विश्लेषण विज्ञतय्सं याना हःगु दु ।

सम्बन्धित बुखँ

LEAVE YOUR COMMENTS