अमेरिकाया राष्ट्रपतिया निंतिं कमला ह्यारिसया उम्मेदवारी घोषणा

वाशिंगटन – अमेरिकाय् आकिवं जुइगु राष्ट्रपतीय निर्वाचनया निंतिं उम्मेदवारी घोषणा यायेगु क्रम शुरु जूगु दु । थ्व झ्वलय् अमेरिकी सिनेटर कमला ह्यारिसं थःगु उम्मेदवारी घोषणा याःगु दु । सन् २००४ निसें २०११ तक निगू कार्यकाल जिल्ला प्रतिनिधितकं जुइधुंकूम्ह कमलां डेमोक्रेटिक पार्टीपाखें अमेरिकाया भावी राष्ट्रपतिया निंतिं उम्मेदवारी घोषणा याःगु खः ।

अमेरिकी मूल्य मान्यताया निंतिं व वइगु दिनय् अमेरिका थः हे आत्म निर्भर जुइमाः धइगु विचाःया पक्षय् कुहां वयाच्वंम्ह कमला थम्हं अमेरिकाया भावी राष्ट्रपतिया निंतिं उम्मेदवारी घोषणा यानागु खः धाःगु दु । सिनेटर कमलां सामाजिक संजाल ट्विटरपाखें छगू भिडियो सन्देश जार याःगु थःगु उम्मेदवारी घोषणा याःगु खः ।

निगू कार्यकाल जिल्ला प्रतिनिधि जुइधुंकूम्ह कमला निक्वःतक क्यालिफोर्निया राज्यया आम निर्वाचनय् नं विजयी जुइधुंकूम्ह खः । अमेरिकाय् सन् २०२० य् राष्ट्रपतिया निंतिं निर्वाचन जुइत्यंगु दु । अमेरिकाया भावी राष्ट्रपतिया निंतिं मेपिं नेतातय्सं उम्मेदवारी बीगु घोषणा याःगु दुसा उम्मेदवारी घोषणा यायेगु क्रम नं न्ह्यानाच्वंगु दु ।