मुआब्जा विवादं शान्तिमण्डला अलपत्रय्

येँ – करिब स्वदँ न्ह्यः हे नक्सा तयार यानाः मण्डला दयेकेगु धयातःगु कोटेश्वर तीनकुनेस्थित ‘तीनकुने शान्तिमण्डला’ मुआब्जा विवादया कारणं ज्या न्ह्याये फयाच्वंगु मदु । येँ महानगरपालिकां नक्सांकन यायेगु ज्या सिधयेकाः स्वदँ न्ह्यः हे कोटेश्वर तीनकुने लागाय् शान्तिमण्डला दयेकेगु तयारी याःगु खः ।

तर उगु लागाया स्थानीयवासीयात बीगु मुआब्जाया खँय् विवाद पिहां वयेवं उगु ज्या न्ह्याये मफयाच्वंगु खँ सीदुगु दु । येँ मनपां कोटेश्वरया तीनकुनेय् च्वंगु करिब ५० रोपनी जग्गाय् स्वदँ न्ह्यः ने शान्तिमण्डला दयेकेगु तयारी न्ह्याकूगु खः । तर मुआब्जा विवाद जुइवं ज्या न्ह्याके मफयाच्वंगु येँ मनपा भौतिक पूर्वाधार महाशाखा प्रमुख रामबहादुर थापां जानकारी बियादिल ।

थौंकन्हय् प्रदेश नं. ३ या भौतिक पूर्वाधारमन्त्री जुयाच्वनादीम्ह केशव स्थापित तत्कालीन इलय् येँ महानगरपालिकाया प्रमुख जुयाच्वनादीगु इलय् वय्कलं तीनकुनेया उगु जग्गाय् महामञ्जुश्रीया झ्वाता तयेगु अडान कयादीगु खः । येँ मनपाया योजनाकथं वइगु २०७६ सालतकया दुने उगु थासय् मण्डला निर्माणया ज्या क्वचायेकेगु लक्ष्य दुगु खः ।

तर मुआब्जा विवादया कारणं मण्डला दयेकेगु ज्या थातिं लानाच्वंगु दु । ‘तीनकुने शान्तिमण्डला’ दयेकेगु धयातःगु उगु थाय्या थःपिंत बीगु धाःगु मुआब्जा मगाः धासें स्थानीयवासीतय्सं विरोध याना वयाच्वंगु खः । इमिसं थःपिंत न्हापा बी धयातःगु मुआब्जाया पुनःमूल्यांकन यायेमाःगु माग याना वयाच्वंगु दु ।

उगु थासय् च्वंपिं नीन्याखा छेँथुवाःतय्सं आतक मुआब्जा काःगु मदुनि । येँ मनपां उगु थासय् शान्तिमण्डला निर्माण यानाः दथुइ बुद्ध मूर्ति तयेगु व मन्दःयात नं बौद्ध व हिन्दू निगुलिं धर्मयात समायोजन यायेकथं दयेकेगु तयारी यानातःगु खः ।

येँ मनपाया तत्कालीन प्रमुख स्थापितं महामञ्जुश्रीया मूर्ति तयेगु अडान कयादीगु खःसां लिपांगु इलय् उगु थासय् शान्तिनायक तथागत गौतम बुद्धया मूर्ति तयेगु तयारी जुयाच्वंगु खःसा मण्डलाया स्वंगू कुनय् हिन्दू धर्मया प्रतिनिधित्व जुइकथं ब्रम्हा, विष्णु व महाद्यःया मूर्ति तयेगु तयारी जुयाच्वंगु खः ।