ने. सं. ११४६ बछलागा तृतीया -

गौतमया फैसला कन्हय्

येँ (नेपालभाषा टाइम्स) – नेपाल कम्युनिष्ट पार्टी (नेकपा) या उपाध्यक्ष वामदेव गौतमयात राष्ट्रियसभा दुजःया रुपय् मनोनित याःगु निर्णय विरुद्ध सर्वोच्च अदालतय् लाःगु रिटया सुनुवाइ कन्हय् जुइगु जूगु दु। म्हिगः सर्वो च्च अदालतया संवैधानिक इजलासया पूर्ण इजलासय् रिट निवेदक व विपक्षी निगुलिं पक्षं बहस याःगु खःसां नं कानुनी व्यवसायीपाखें बहस यायेगु ज्या क्वमचाःगुलिं कन्हय् तक बहस न्ह्याइगु जूगु खः ।

नेकपाया उपाध्यक्ष गौतमयात सरकारया सिफारिसय् राष्ट्रपति विद्यादेवी भण्डारीं राष्ट्रियसभा दुजलय् मनोनयन यायेवं वरिष्ठ अधिवक्ता दिनेश त्रिपाठी व अधिवक्ता बद्रीराज भट्टं उगु निर्णय बदर जुइमाःगु माग यासें सर्वोच्चय् रिट तःगु खः । थ्व स्वयां न्ह्यः गौतमयात गुगुं नं कथंया संवैधानिक पदय् नियुक्त मयायेत सर्वोच्च अदालतं अन्तरिम आदेश जारी याःगु खः ।