चिकं साः पुनःनिर्माण यायेत सहलह

थिमि – मध्यपुर थिमि नगरपालिका वडा नं. ४ साःननि, लाय्कुलिइ परम्परागत चिकं साः पुनःनिर्माण यायेगु विषयय् सहलह मुँज्या जुल । सिवा साय्मि खलः थिमिया विशेष पहलय् तःदँ न्ह्यवंनिसें बन्द जुयाच्वंगु परम्परागत चिकं साः पुनःनिर्माण यानाः संचालन यायेगु ल्याखं उगु सहलह जूगु खः ।

खलःपाखें बिउगु जानकारीकथं करिब ०३८ सालतक संचालन जुयाच्वंगु साः लिपा वनाः भग्नावशेषय् परिणत जुयाच्वंगु खः । वयांलिपा ४४÷४५ सालपाखें उगु भग्नावशेष चिइकाः साः दुगु थाय् खालीं त्वःता तःगु खःसा आः वयाः खलःया स्थानीय ल्याय्म्हतय् सक्रियताय् परम्परागत चिकं साःयात हाकनं पुनःर्जीवित यायेगु कुतः कथं उगु सहलह न्ह्याःगु खः ।

सहलह मुँज्यां खलःया न्वकु गंगाराम मानन्धरया अध्यक्षताय् झिंछम्हेसिया छगू उपभोक्ता समिति नं गठन याःगु दु । समितिइ मानन्धर समुदायपाखें खलःया दुजःपिं न्हय्म्ह व स्थानीयवासी श्रेष्ठ समुदायपाखें स्वम्ह दुथ्याः । उपभोक्ता समितिपाखें हे साः पुनःनिर्माणया निंतिं लागत अनुमान यायेगु निसें माःगु सकतां व्यवस्था याइगु खलकं जानकारी बिउगु दु ।

वंगु फागुन ७ गते जूगु सहलह मुँज्याय् मध्यपुर थिमि नगरपालिकाया प्रमुख मदनसुन्दर श्रेष्ठलिसें स्थानीय जनप्रतिनिधि, पूर्व वडाअध्यक्षलिसें व खलःया सकल जःपिनिगु नं उपस्थितिइ दुगु खः । चिकं साः पुनःनिर्माणया निंतिं नगर प्रमुख श्रेष्ठं चालु आर्थिक दँया बजेटपाखें ५० गू लाख ग्वाहालि यायेगु प्रतिवद्धता प्वंकादिसें आवश्यक जुल धाःसा मेगु दँय् नं थप ग्वाहालि यायेगु बचं बियादीगु खः ।

पाःताः जुयाः खाली जुयाच्वंगु थासय् हाकनं चिकं साः पुनःनिर्माणया डिजाइन यायेत इन्जिनियर रन्जय मानन्धर व वडा नं. ४ या प्रेमलाल भासिमयात जिम्मेवारी बिउगु दु । चिकं साः पुनःनिर्माण यानाः परम्परागत उत्पादन याना वयाच्वंगु तू चिकं उत्पादन यायेगु खलकं जानकारी बिउगु दु ।

सम्बन्धित बुखँ

LEAVE YOUR COMMENTS