सांसदपाखें एअरपोर्ट काउन्टर तोडफोड

येँ – राष्ट्रिय जनता पार्टी (राजपा) या सांसद प्रमोद कुमार साहं जनकपुर विमानस्थलय् तोडफोड याना बिउगु दु । सर्लाही क्षेत्र नं. १ पाखें निर्वाचित सांसद साहं विमानस्थलय् बुद्ध एअरया काउन्टर तोडफोड याःगु खः । बुद्ध एअरया विमान इलय् मब्वः धासें सांसद साहं काउन्टरय् तोडफोड याःगु खः ।

काउन्टर तोडफोड याःगु खँ तसकं बय्बय् जुइवं सांसद साहं थःपिंसं छाय् तोडफोड याये माल धइगु खँय् स्पष्टीकरण बियादीगु दु । वय्कलं कनादी कथं वय्कः लगायत प्रदेशया स्वम्ह सांसदत विमान गयेगु लागिं इलय् हे विमानस्थलय् थ्यंगु खः । सुथय् ११ः४० बजे विमान धाःगु खःसां निघौत्या तक विमान तक हे थ्यंकः मवः ।

अन विमान पियाच्वंपिं मध्ये छम्ह नुगःचुया विरामी नं दुगु जुयाच्वन । जनकपुरं येँय् वयाः म्हिगः हे डाक्टर समेत नापलायेगु वयागु ज्याझ्वः दुगु खः । तर स्वघौ तक नं विमान मवयेवं उम्ह विरामीं काउन्टरय् विमान गबले वइ धकाः न्यं वनाच्वंगु खःसा काउन्टरं लापर्वाही याःगु कारणं आक्रोशित जुयाः थम्हं काउन्टरय् तोडफोड यानागु खँ स्वीकार यानादीगु दु ।