स्वयम्भूया बहुमंगलद्वार चैत्यय् प्राणप्रतिष्ठा

येँ – विश्व सम्पदाया धलखय् दुथ्यानाच्वंगु स्वयम्भूया आपालं सम्पदा व स्मारक पुनःनिर्माण यायेगु ज्यां गति काये फयाच्वंगु मदु । यद्यपि छुं छुं स्मारक धाःसा पुनःनिर्माणया अन्तिम चरणय् थ्यनेधुंकूगु दु । थ्व हे झ्वलय् पुनःनिर्माण सम्पन्न जूगु बहुमंगलद्वार चैत्यय् प्राणप्रतिष्ठा यायेगु ज्या जूगु दु ।

थनि स्वदँ न्ह्यः गोरखा केन्द्रविन्दु जुयाः ब्वःगु तःभुखाचं क्षतिग्रस्त चैत्यया पुनःनिर्माण याःगु खः । पुरातत्व विभागं उगु चैत्य पुनःनिर्माणया निंतिं स्वयम्भू व्यवस्थापन तथा संरक्षण महासमितियात अनुमति बिउगु खः । स्वयम्भू महाचैत्यं करिब २० मीटर तापाक लानाच्वंगु चैत्य पुनःनिर्माणया निंतिं विभागं स्वीकृति बीवं महासमितिं पुनःनिर्माणया ज्या न्ह्याकूगु खः ।

चैत्यय् प्राण प्रतिष्ठा ज्याझ्वलय् झायादीम्ह संयुक्त राष्ट्र संघया शैक्षिक, विज्ञान व सांस्कृतिक निकाय युनेस्कोया देशीय प्रतिनिधि क्रिष्टियन म्यानहर्टं प्राचीन व पुरातात्विक महत्वया सम्पदा संरक्षण यायेगु युनेस्कोया नीति जूगु खँ धयादीगु खः ।

राष्ट्र संघीय निकाय युनेस्कोया ४६ लाख व महासमितिया थप गुंगू लाखया लागतय् चैत्य पुनःनिर्माण याःगु खः । झण्डै १० मिटर तजाःगु चैत्य न्यागू खण्डया दुसा उकी थीथी द्यःया चीधंगु व तःधंगु यानाः १२० गू मूर्ति दु ।