नुवाकोटया लिच्छविकालीन स्वयम्भू दयेकेगु शुरु

नुवाकोटया लिच्छविकालीन स्वयम्भू दयेकेगु शुरुयेँ (नेपालभाषा टाइम्स)÷विदुर नगरपालिका वडा २ स्थित महामण्डलय् च्वंगु ऐतिहासिक स्वयम्भू (चैत्य) विहारया पुनःनिर्माण ज्या स्थानीयबासीया पहलय् न्ह्यःने न्ह्याकूगु दु । थ्व स्वयम्भू चैत्य १४०० दँ न्ह्यः निर्माण जूगु धइगु ऐतिहासिक तथ्य लुया वःगु खँ धाःगु दु । उकिया लिधंसाय् थ्व चैत्य लिच्छविकालीन खः धइगु प्रमाणित जूगु खः ।

ताः ई न्ह्यवंनिसें जीर्ण अवस्थाय् लानाच्वंगु थ्व चैत्यया ऐतिहासिक तथ्य सार्वजनिक जुइवं स्थानीय जनताया आर्थिक संकलनपाखें आः पुलांगु हे स्वरुपय् निर्माण यायेगु कथं ज्या न्ह्याःगु खः ।

विदुर नगरपालिकाया इनापय् थगुने पुरातत्व विभागं याःगु अध्ययनं लिच्छलिकालीन ईयागु स्वयम्भू (चैत्य) यात तत्काल हे संरक्षण यायेमाः धकाः न्ह्यथंगु खः । तर बजेट मदुगुलिं संरक्षण याये मफयाच्वंगुलिं आः स्थानीयवासीपाखें हे स्वःस्फूर्त रुपं संरक्षण जुयाच्वंगु खँ नुवाकोट स्वयम्भू महाचैत्य संरक्षण संस्थाया दुजः लिसें अभियन्ता गौतममान सिंहं कनादीगु दु ।

वय्कःया कथं पुरातत्वविद्तलिसे जानाः तयार याःगु गुरु योजना कथं बुद्धलिसे सम्बन्धित सछि व च्यागः चैत्य, स्वसः स्वयां अप्वं बोधिसत्व–तारा, द्वःछिगः व प्यंगः स्वयम्भू चैत्यसहित विशाल स्वयम्भू महाचैत्य पुनःनिर्माण यायेगु ज्या न्ह्याकाच्वंगु खः । वय्कलं कनादीकथं थ्व स्वयम्भू–चैत्य निर्माणया ज्या प्यंगू चरणय् याइगु ग्वसाः दु । न्हापांगु चरणय् ल्वहंयागु त्वाथः दयेकेगु, निगूगु चरणय् झिंन्यापी जग्गायात पूर्णरूपं ऐतिहासिक झलक वयेक ल्वहंया पःखाः दयेकाः १०८ चैत्य, ३०० स्वयां अप्वः बोधिसत्व–तारा, १००४ गः स्वयम्भू चैत्यया प्राण प्रतिष्ठा यायेगु, स्वंगूगु चरणय् विशाल स्वयम्भू महाचैत्य निर्माण यायेगु व प्यंगूगु चरणय् बौद्धधर्म अध्ययन केन्द्र, ध्यानकेन्द्र आदि दयेकेगु ज्या जुइ ।