सरकारयात मेयर बालेन साहया ख्याच्वः ‘राजधानी मेथाय् तये यंकि’

येँ(नेपालभाषा टाइम्स)-सिंहदरवार व राष्ट्रपति भवनया फोहोर मुनेगु बन्द यानाः सरकारयात हाथ्या बियाच्वंम्ह येँ मनपाया मेयर बालेन साहं म्हिगः हानं मेगु स्टाटस च्वयाः सरकारयात हाथ्या बिउगु दु । वय्कलं यदि ज्या मयायेगु खःसा देय्या राजधानी हे मेथाय् सारे यायेमाःसां या धकाः सरकारयात हाथ्या बियादीगु खः ।

सामाजिक सञ्जालय् वय्कलं च्वयादीगु न्हूगु स्टाटसय् सिंहदरवारयात मेगु पालिकाय् सारे याये यंकि, मखुसा राजधानी हे मेथाय् सारे याये यंकि धकाः सरकारयात तप्यंक हाथ्या बियादीगु दु । वय्कलं काठमाडौंवासीयात राजधानी सिबें नं थःगु कला व संस्कृति यः धासें राजधानी मेथाय् तये यंकेत हाथ्या बियादीगु खः ।

मेयर बालेन साहया थ्व हाथ्यायात यँेया स्थानीय जनतां तारिफ याःगु दु । लुमंकेबहः जू, राजधानी तयातःगु कारणं पिनेयापिं मनूत यक्व वयाः येँया कला, संस्कृति, भाषा व सम्पदाय् नकारात्मक लिच्वः लानाच्वंगु खँय् येँया स्थानीय जनतां ताःई न्ह्यवंनिसें चिउताः तया वयाच्वंगु खः ।

थ्वहे झ्वलय् मेयर बालेन साहं सिंह दरवारया फोहोर मुनेगु बन्द यानाः सरकारयात हाथ्या बियाच्वंगुलिं आः वय्कःलिसे गुकथं डिल याये माली धइगु खँयात कयाः सरकारय् दुथ्याःगु निगू तःधंगु दल नेपाली कांग्रेस व माओवादी दथुइ समेत मतभेद ब्वलंगु खँ सीदुगु दु ।

बालेनपाखें थुकथंया अस्वाभाविक पलाः ल्ह्वनाच्वंगुलिं वय्कःयात पेले यानाः न्ह्याः वने माली धइगु बिचाः माओवादी पक्षं तयेगु याना हःगु दु । उकिया संकेत कथं वय्कःयात गृहमन्त्री नारायणकाजी श्रेष्ठ व सञ्चारमन्त्री रेखा शर्मां लिसः नं बीधुंकूगु दु । तर कांग्रेस पक्षया नेतात धाःसा बालेनया सःताः न्हापां वार्ता यायेगु व वय्कःलिसे फयांफछि मिले जुयाः न्ह्याः वनेमाः धइगु पक्षय् वनाच्वंगु दु । छुं कडा पलाः मल्ह्वनेत नं कांग्रेसं पनाच्वंगु खँ धाःगु दु ।