नखः वल गज्याःगु ला नयेगु ?

येँ – थुगुसी मोहनिया इलय् स्वनिगलय् लाया अभाव जुइ धकाः वयाच्वंगु समाचारय् छुं नं सत्यता मदुगु पशुपछि विभागं न्ह्यथंगु दु । वंगु छुं दिं न्ह्यवंनिसें छुं छुं संचार संस्थां मोहनिया इलय् लाया अभाव जुइ धकाः समाचार प्रकाशन व प्रशारण यायेवं लिपांगु इलय् वयाः विभागं उकथंया प्रतिक्रिया बिउगु खः ।

स्वनिगलय् झण्डै स्वीन्यागूनिसें पीगू लाख मनू च्वनाच्वंगु अनुमान दु । नागढुंगा प्रहरी चेकपोष्टं मोहनिया इलय् झण्डै नीगूनिसें नीन्यागू लाख मनू स्वनिगलं पिहां वनीगु अनुमान याःगु दुसा विदेशं स्वदेश लिहां वइपिं नं अप्वःथें गामय् हे लिहां वनेगु यानाच्वंगु दु । उपत्यका ट्राफिक प्रहरीयाकथं थगुने मोहनिया इलय् नीन्यागू लाख मनू स्वनिगलं पिहां वंगु खः ।

मोहनिया अस्तमिनिसें दशमितक स्वन्हु स्वनिगलय् लाया आपालं माग व खपत जुइगु याइ । उकिया निंतिं लाया अभाव जुइके मबीत पशुपछि विभागं आयातय् प्रतिबन्ध मतयागु तर विदेशं आयातीत पशुपछिया अनिवार्य पशु क्वारेन्टाइन जाँच पास जुइमाःगु व्यवस्था दुगु पशुपछि विभागया महानिर्देशक वंशी शर्मां कनादिल ।

पशुपक्षीविज्ञया कथं चौपाया व पछियात यातनापूर्वक ओसारपासार याये मदइगु कानूनी प्रावधान दु । पशु क्वारेन्टाइन जाँच पास याइगु निकाय सिन्धुपाल्चोकया तातोपानी, रसुवाया टिमुरे, चितवनया रामनगर, येँया त्रिभुवन अन्तर्राष्ट्रिय विमानस्थल, नागढुंगा, सक्व, फम्पि, सामाखुसि, तोखा लगायतया थासय् दु ।

पशुपक्षी वा पशुजन्य वा पशु उत्पादन सामग्रीइ गुगुं नं ल्वय दु वा मदु, यकिन यायेत स्थापना यानातःगु निकाय खः, पशु क्वारेन्टाइन ।
यातनापूर्वक पशुपक्षीया ढुवानी यायेगु ज्या ‘पशु स्वास्थ्य तथा पशु सेवा ऐन, २०५५’ अःखः जुइ । पशु विकास अधिकृत डा. श्रीराम अधिकारीं यातनापूर्वक ओसारपसार याःपिं पशुपक्षीया ला स्वास्थ्यया निंतिं अस्वस्थकर जुइगु धयादिल ।

पशुपक्षीया ढुवानी यायेबलय् न्हासय् खिपः तयेगु, न्हिप्यं व तुतिइ चिइगु, क्षमता स्वयां अप्वः तयेगु, हावादार साधनया प्रयोग मयायेगु, यात्रुवाहक बसया डिक्कीइ तयाः ढुवानी यायेगु, ढुवानीया साधनय् उपचारया बक्स मतयेगु, दथु दथुइ नयेगु वा त्वनेगु लःया व्यवस्था मयायेगु, चिधिकःपिं व तःधिकःपिं पशु छगू हे थासय् तयाः ओसारपसार यायेगु ज्या पशुपक्षीया निंतिं यातना बिउगुकथं थुइकेमाःगु ऐनय् न्ह्यथनातःगु दु ।

पशु स्वास्थ्य तथा पशु सेवा ऐन, २०५५य् ल्वगि, घाःपाः वा सीम्ह पशुयात व्यावसायिक प्रयोजनया निंतिं ढुवानी याये मदइगु किटान यानातःगु दु, तर अज्याःगु ज्या ढुवानी मापदण्ड २०६४ कथं पशुपक्षीयात यात्रुवाहक सार्वजनिक सवारी साधनया छतय् वा डिक्की तये मजिउगु व मुलुकी अपराध (संहिता) ऐन, २०७४ य् ल्वगि पशुया ढुवानी याःगु प्रमाणित जुल धाःसा १० दँ तकया कैद व छगू लाख तक जरिवाना क्वछिनातःगु दु ।

मोहनिया इलय् मनूतय्सं साक्क भिंक नयेगु परिकारया रुपय् ला नयेगु बानीया पलेसा दुरु, धौ, पनिर, खिर, मरिचरि, गुँडपाक, प्वस्तिकं, म्हुकं, न्या नं नयेगु याः । पशुसेवा विभागया तथ्यांककथं थुगुसी स्वनिगलय् खुगू लाख व स्वनिगलं पिने नीन्हय्गू लाख खसि, दुगु, फै खपत जुइगु अनुमान याःगु दु ।

थुपिं खसि, दुगु, फै बाहेकं खा गुगुं लाख, म्येय् झिंन्यागू लाख केजी आवश्यक जुइ । उत्पादनया ल्याखं म्येय् छगू लाख न्हय्खुद्वः, खा ५५ हजार मेट्रिक टन लाया निंतिं तयारी अवस्थाय् दुगु विभागं जानकारी बिउगु दुसा थ्व बाहेकं खाद्य संस्थानं निद्वः व निजी व्यवसायीं खुद्वः फै, च्यांग्रा हइगु जूगु दु ।

व्यापारीं स्वनिगलय् तराईया २२ गू जिल्ला लगायत सुर्खेत, सल्यान, रुकुम, दाङ, बाँके, बर्दिया, सिन्धुली रामेछाप, काभ्रे, नुवाकोट, धादिङ लगायतया जिल्लां खसि, दुगु व हिमाली जिल्ला मनाङ, मुस्ताङ, रसुवा, तिब्बतं फै व च्यांग्रा मीत हयेगु याइ । स्वन्हुतक मोहनिया इलय् न्या, पैm, च्यांग्रा, खराःचा, हँय्, लौकाट, अस्ट्रिच, बंगुर, सुंगुर, बँदेलया ला नं खपत जुइ ।

न्या १५ निसें २० गू लाख, फै स्वद्वः, बंगुर नीप्यद्वः, च्यांग्रा करिब निद्वः मेट्रिक टन लाया निंतिं तयारी अवस्थाय् दु । लिपांगु तथ्यांककथं नेपालय् छगू करोड नीन्याच्यागू लाख खसि, दुगु, च्वलेचाया ल्याः दु । उकीमध्ये ३० प्रतिशत अर्थात लाया निंतिं स्वीच्यागू लाख पीद्वः खसि, दुगु स्याये जिउगु अवस्थाय् दु ।

मोहनिया थ्व स्वन्हुया निंतिं स्वनिगलय् जक खुगू लाख स्वयां अप्वः खसि, दुगु खपत जुइ । नेपालय् दकलय् अप्वः धाःसा म्येय्या ला खपत जुइ । खपतया ६३ प्रतिशत अर्थात छगू लाख ८५,९५५ मेट्रिक टन म्येँय् लाया ममः, छ्वयेला, सुकुति, कचिला लगायतया लाया परिकार दयेकाः नयेगु प्रचलन दुसा मोहनिया इलय् म्येय्या ला स्वयां नं अप्वः खसि दुगुया ला खपत जुइगु याः ।

सम्बन्धित बुखँ

LEAVE YOUR COMMENTS