चीनं रेल हये तसकं थाकु

येँ  – चीन व नेपाः स्वाइगु रेल मार्ग दयेकेगु धकाः वयाच्वंगु चर्चा गुलि उत्साहवद्र्धक खः उलि हे कठिन नं जूगु खँ प्राविधिकतय‍्स‌ं धाःगु दु ।

केरुङ–येँ स्वाइगु थ्व लँपु तसकं तजाःथाय् लाःगु कारणं जक मखु भूबनोटया ल्याखं नं तसकं थाकुगु थाय् जूगु कारणं थ्व रेल मार्ग दयेकेत तसकं उच्चस्तरीय प्रविधि आवश्यक जुइगु खँ धाःगु दु ।

थ्व रेल वइगु लँय् हे तिब्बती प्लेट भारतीय प्लेटय् दुहां वनाच्वंगु जूगुलिं अज्याःथाय् रेल मार्ग दयेकेगु तसकं थाकुइगु खँ नं प्राविधिकतय्सं धाःगु दु । चिनियाँ प्राविधिकतय्सं थ्व रेल मार्गया निर्माण तसकं कठिन खःसां असम्भव धाःसा मखु धाःगु दु ।
थ्व रेलमार्ग बारे खँ ल्हायेत वंगु वालय् नेपाःया छगू पुचः चीन वंगु दु । उगु पुचलं चीनय् थःपिनि प्रतिवेदन लःल्हाइगु व वयां लिपा रेल मार्ग गय् यानाः दयेकेगु धइगु खँय् निर्णय याइगु खँ धाःगु दु ।

तसकं जोखिमपूर्ण थाय् व तसकं उच्चस्तरया प्रविधि मालीगु जूगुलिं थ्व रेल मार्गया निर्माण तसकं थिके जुइगु खँ नं धाःगु दु ।
केवल १०० किलोमिटर जक दुगु थ्व रेलमार्ग दयेकेगु लागिं २८० अर्ब तका खर्च जुइगु प्रारम्भिक अनुमान यानातःगु दु । थुलि दां खर्च यानाः नेपालं थ्व रेल मार्ग दयेकेगु छुं हे कथं सम्भव मदुगु खँ नेपाः पक्षं धाःगु दु ।
सूत्रतय्सं धाः कथं थ्व रेल मार्ग छगू चीनं अनुदानय् दयेका बीगु आशा नेपालं यानाच्वंगु दु । तर चीन सरकारं धाःसा आः तक थुकिया बारे छुं न्ववाःगु मदुनि ।

नेपालं चीनयात थ्व रेल मार्ग दयेका बिउ धकाः छुं कथं इनाप नं मयाःनिगु खँ धाःगु दु । उखे चीनं धाःसा ल्हासांनिसें केरुङ तक वये मानिगु रेल हे महःनिगु जुयाः वयां लिपाया योजना बारे छुं न्वमवाःगु अनुमान जुयाच्वंगु दु ।

सम्बन्धित बुखँ

LEAVE YOUR COMMENTS