ने. सं. ११४४ कौलाथ्व पारू - नःलास्वनेगु

ख्वाः बांलाकेत खिचाया च्व

हिन्दू धर्मय् आस्था व विश्वास याइपिंसं साया च्व त्वंगु ला झीस खना वयाच्वनागु हे खः । थ्व चलन आतक नं कायम हे दु । तर आः वयाः साच्व जक मखु खिचाया च्व त्वनेगु नं चलन (फेशन) शुरु जूगु दु । तर थ्व छुं धर्म वा सम्प्रदायय् आस्था दुपिं वा विश्वास याइपिंसं मखु ।
थ्व ला छम्ह मिसां थःगु ख्वाः बांलाकेत व ख्वालय् चमक वयेकेत खिचाया च्व त्वनेगु फेसन शुरु याःगु खः ।

अले ख्वालय् खने दइगु थीथी कथंया चातः मदयेका छ्वयेगु निंतिं नं उम्ह मिसां थथे खिचाया च्व त्वनेगु याना वयाच्वंगु खः । नां खुले याना मतःम्ह उम्ह मिसां थःगु हे छेँय् लहिनातःम्ह खिचाया च्व त्वनेगु यानागुलिं थःगु ख्वाःया चमक अप्वया वःगु जक मखसे ख्वालय् च्वंगु थीथीकथंया चातः नं मदया वंगु दावी याःगु दु ।

यक्वसिनं जिज्ञासा तयाः न्यनेगु याः कि जि न्ह्याबलें थुभनं छाय् बांलाः खने दयाच्वंगु ? थुकिया रहस्य छु खः ? ख्वाःया समाः (मेकअप) न्ह्याबलें पर्फेक्ट गथे जुयाः खने ? ख्वालय् न्ह्याबलें उलि हे चमक गथे जुयाः दयाच्वंगु ? थथे थीथीकथंया न्ह्यसःत न्यनेगु यानाच्वंगु उम्ह मिसाया दावी दु । उम्ह मिसाया धापू दु, ‘जब जिं खिचाया च्व फायेगु ई जुइ । जिं छगः कपय् च्व फाकेगु खः ।

अले वयात तत्काल हे त्वना छ्वयेगु ।’उम्ह मिसाया सार्वजनिक जूगु छगू भिडियोलय् खिचाया च्व त्वनाः जुइगु फाइदाया बारे वं धयातःगु दु, ‘जिं थः खिचाया च्व त्वनेगु शुरु याये न्ह्यःतक जि तसकं ‘डिप्रेस्ड’ जुयाच्वनाम्ह खः, छाय्धाःसां अबलय् जिगु ख्वालय् तसकं चातः चातः वयाः ख्वाः हे स्वये मजियाच्वंगु खः ।

जब जिं खिचाया च्व त्वनेगु शुरु याना, बुलुहुं व दक्वं मदया वन ।’खिचाया च्वय् भिटामिन ए व ई नापं क्याल्सियम थेंज्याःगु तत्व दुगु व खिचाया च्व सेवनं क्यान्सर थेंज्याःगु ल्वचं तकं बजे याइगु वयागु दावी दु ।