बुंगद्यःया देगः आः यल मनपां हे दना बीगु

यल (नेपालभाषा टाइम्स)- बुंगय् दनाच्वंगु बुंगद्यःया देगः आः यल महानगरपालिकां दनीगु जूगु दु । बुंगय् दनाच्वंगु देगःया ल्यं दनिगु ज्या यल मनपां हे दना बीत्यंगु खः । उकिया लागिं नगरसभापाखें बजेट नं फ्याःगु दु ।

चालु आर्थिक दँया दुने देगः दनेक्वचायेकेत १ करोड तकाया बजेट विनियोजन याःगु खः । देगः दनेत आः तक ३ करोड खर्च जुइधुंकूगु दु । यल मनपाया प्रवक्ता राजु महर्जनं ल्यं दनिगु ज्याया नेतृत्व यानाः देगः दनेत बजेट फ्यानागु खँ कनादीगु दु ।

थ्व स्वयां न्ह्यः पुनर्निर्माण प्राधिकरणया ग्वाहालिइ पुरातत्व विभागं देगः दनेगु ज्या यानाच्वंगु खःसा पुनर्निर्माण प्राधिकरण विघटन जुइवं वयां लिपा उपभोक्ता समिति दयेकाः ज्या न्ह्याकाच्वंगु खः ।

ज्या क्वचाये न्ह्यः हे उपभोक्ता समितिलिसे जूगु सम्झौताया म्याद क्वचाःगुलिं मेगु ज्या यायेत समस्या जुयाच्वंगु खः । पुरातत्व विभागया अधिकृत सविता न्यौपानें पुरातत्व विभागं लिपांगु इलय् कानुन मदुगुलिं उपभोक्ता समितिया म्याद थप याये मफुगु जानकारी बियादीगु दु । उकिया नितिं मन्त्रालयय् पत्राचार यानागु खःसां नं लिसः मवःनिगु खँ नं वय्कलं धयादीगु दु ।

२०७२ सालया भुखाचय् दुनावंगु थ्व देगः शुरुइ श्रीलंका सरकारया ग्वाहालिं पुनर्निर्माण याःगु खःसां दथुइ हे ठेकेदारं ज्या त्वःता वनेवं पुनर्निर्माण उपभोक्ता समिति व पुरातत्व विभाग जानाः ज्या न्ह्याकूगु खः । आः थुकिं नं याये मफयेवं मनपा न्ह्यचिउगु खः ।