वाङमय शताब्दि पुरुष सत्यमोहन जोशीया जन्मजयन्ती छवाः यंकं हनिगु

यल (नेपालभाषा टाइम्स)- वाङमय शताब्दीपुरुष सत्यमोहन जोशीया १०५ क्वःगु बुन्हिया झ्वलय् लोक साहित्य परिषदया ग्वसालय् थीथी ज्याझ्वः न्ह्याःगु दु । वय्कः बूगु न्हि बैशाख ३० गते तःजिक हनेगु झ्वलय् सोमवाः निसें छवाःयंकं थीथी ज्याझ्वः ग्वसाः ग्वयागु खँ लोक साहित्य परिषद्या नायः राजित बहादुर श्रेष्ठं कनादिल ।

थ्वहे झ्वलय् न्हापांगु न्हि सोमबाः कुन्हु सत्यमोहन जोशी लोक साहित्य भवनय् शताब्दी पुरुष जोशीया सफू ब्वज्या जूगु दुसा निन्हु न्हि बैशाख २५ गते मङ्गलबाः परिषदया परिसरय् नामसंगीति पाठ जूगु दु । अथेहे स्वन्हु कुन्हु २६ गते बुधबाः सत्यमोहन लोक साहित्य संग्रहालय अवलोकन याकेगु ज्याझ्वः तयातःगु दुसा २७ गते बिहीबाः पुलां गुह्येश्वरी द्यःया थाय् मत च्याकेगु ज्याझ्वः तयातःगु दु ।

ज्याझ्वः कथं २८ गते शुक्रबाः लोक साहित्य वाचन जुइगु ग्वसाः दुसा २९ गते शनिवाः सुथय् यलया पूच्वं साइकल ¥यालि जुइगु व ३० गते आइतबाः परिषद परिसरय् थीथी सफूया पितब्वज्या जुइगु ज्याझ्वः क्वःछिनातःगु दु ।

छवाःयंकं थीथी ज्याझ्वः यानाः वाङ्मय शताब्दीपुरुषया जोशीया जन्मजयन्ती हनेगु ज्या थगुने निसें लोक साहित्य परिषदं शुरु याःगु खः ।