यःसिं हनुमानध्वाखा थ्यन
येँ(नेपालभाषा टाइम्स)÷ यँयाःया निंतिं यःसिं हनुमानध्वाखाय् थ्यंके हःगु दु । थनया भोताहितिइ तयातःगु यःसिं कायास्तमिकुन्हु नगर प्रवेश याकेगु धकाः अनं साला हयाः हनुमानध्वाखाय् थ्यंके हःगु खः ।
बुधवाः कायास्तमिकुन्हु साइतकथं सुथसिया १० ३२ या मिनेटय् यःसिं भोताहितिं सालाः हनुमानध्वाखाय् थ्यंके हःगु खः ।
वंगु यंलाथ्व दुतियाकुन्हु ख्वपया सूर्यविनायक नगरपालिकाया चित्तपोलय् यःसिंयात क्षमा पुजा यानाः अनं साला हःगु यःसिं भोताहितिइ तयातःगु खः । कायास्तमिकुन्हु नगर प्रवेश याकाः हनुमानध्वाखाय् थ्यंके हःगु यःसिं वइगु यंलाथ्व द्वादशिकुन्हु थनी । वकुन्हु सुथसिया ८ः२६ या साइतय् यःसिं थनी । यःसिं थनेवं यँयाःया नं विधिवत रुपं न्ह्याइ । व स्वयां छन्हु न्ह्यः यंलाथ्व एकादशिकुन्हु चस्वांद्वँ त्वाःया साय्मितय्सं यःसिंलय् वलः घाइ । वलः घायेगु धइगु यःसिं थनेत माःगु खिपः परम्परागत रुपं चिइगु खः ।
LEAVE YOUR COMMENTS