आन्दोलनया प्रतिवेदन न्ह्यःने वल
गुथि सम्बन्धी न्हूगु विधेयक मस्यौदा यायेगु मू आधार
येँ – थौं–कन्हय् न्ह्यानाच्वंगु गुथि विधेयक विरुद्धया आन्दोलनं यानाः सरकारया दराजय् गनं वांछ्वया तयेधुंकूगु पुलांगु प्रतिवेदन हानं छक्वः पुइकेमाःगु जूगु दु । थनिं झिदँ न्ह्यः यँयाःया इलय् पिहां वयेमाःपिं द्यःपिंत बीगु बलि खर्च रोके याना बीवं ब्वलंगु आन्दोलनया लिच्वः कथं गठन याःगु उच्चस्तरीय अध्ययन समितिं उगु प्रतिवेदन तयार याःगु खः ।
दछि तकया अध्ययन लिपा समितिं गुथि संस्थान भंग यानाः गुथितय्त हे शक्तिशाली दयेकाः न्ह्याः वनेगु संरचना सहित सरकारयात प्रतिवेदन लःल्हाःगु खः । तत्कालीन संस्कृति मन्त्री डा. मिनेन्द्र रिजालयात लःल्हाःगु उगु प्रतिवेदन वयां लिपा सरकारं मेमेगु प्रतिवेदन थें गनं दराजय् धुलं गायेकाः वांछ्वयातःगु नं जुइफु ।
आः माःबलय् सरकारयाके उगु प्रतिवेदन द नं मदु । तर गुथि विधेयक विरुद्धया आन्दोलनकारीतय्सं आः थ्वहे प्रतिवेदनयात मूल आधार दयेकाः गुथि सम्बन्धी न्हूगु विधेयक मस्यौदा यायेमाः धकाः माग न्ह्यःने तःगु दु । म्हीग राष्ट्रियसभां विधेयक लित काल धइगु समाचार सार्वजनिक जुइवं आन्दोलनकारीतय्पाखें कजि डा. महेशमान श्रेष्ठं जारी यानादीगु वक्तव्यय् आः थ्वहे प्रतिवेदनयात मूल आधार दयेकाः न्हूगु विधेयक मस्यौदा यायेमाः धयातःगु दु ।
लिसें वक्तव्यय् आदिवासी जनताया प्रथाजन्य परम्परायात मान्यता बीगु राष्ट्रिय अन्तर्राष्ट्रिय सन्धि सम्झौतातय्त नं आधार दयेकाः न्हूगु विधेयक मस्यौदा यायेमाःगु खँ नं न्ह्यःने तःगु दु । झिदँ न्ह्यः तत्कालीन नेवाः देय् दबूया महासचिव पवित्र वज्राचार्यया संयोजकत्वय् गठन याःगु उगु अध्ययन समितिं डा. चुन्दा वज्राचार्ययात कजि दयेकाः छगू अनुसन्धान कार्यदल गठन यानाः स्वनिगः दुने व पिनेया फुक्क हे गुथिया लगत कायेगु ज्या याःगु खः ।
उगु इलय् गुथि संस्थानं धाःसा समितियात माःगु सूचना मबिसे असहयोग याःगु खः । उगु प्रतिवेदनय् गुथि संस्थान मदयेधुंकाः निर्माण जुइगु गुथि सञ्चालन सम्बन्धी संरचना व उकिया छगू विधेयकया मस्यौदा समेत प्रस्तावित याना तःगु दु ।
LEAVE YOUR COMMENTS