चन्द्रगिरि नपाय् नं स्थानीय पाठ्यक्रम

येँ – येँय् नं दक्षिण पश्चिम भेगय् लाःगु चन्द्रगिरि नगरपालिकां नं स्थानीय पाठ्यक्रम कार्यान्वयनय् हइगु जूगु दु। नगरपालिका अन्तर्गत संचालन जुयाच्वंगु ब्वनेकुथिइ अध्ययन याइपिं ब्वँमिपिनिगु निंतिं स्थानीय पाठ्यक्रम तयार यानाः कार्यान्वयनय् हयेत्यंगु खः ।

नगरपालिकाया प्रवक्ता हरिभक्त महर्जनं कनादीकथं ऐतिहासिक नगर दुनेया सांस्कृतिक, सामाजिक, पर्यटकीय लगायत थीथी पक्षयात
कःघानाः पाठ्यक्रम निर्माण यायेगु ज्या जुयाच्वंगु दु ।

नगरपालिकां पाठ्यक्रम निर्माणया निंतिं नगरपालिका अन्तर्गतया सामाजिक विकास समितिया संयोजक सन्तोष खड्काया संयोजकय्
पाठ्यक्रम विज्ञ, संस्कृति व इतिहासविद्, पर्यटनविद्, प्रधानाध्याक सहितया छगू समिति गठन या:गु खः ।

पाठ्यक्रमया निंतिं विषय, क्षेत्र, विषयवस्तु, तहगत सक्षमता, उद्देश्य, पाठ्यभार तह तकं तयार यायेगु ज्या जुइधुंकूगु प्रवक्ता महर्जनं कनादिल ।

वइगु आर्थिक दँ ०७७-७८या असार मसान्त तकया दुने पाठ्यक्रम तयार याये सिधयेकेगु लक्ष्य नगरपालिकां कयातःगु दु। पाठ्यक्रम तयार जुइवं नगर दुनेया दक्वं ब्वनेुकथिइ लागू यायेगु वय्कलं कनादिल ।