ने. सं. ११४४ कौलाथ्व चौथी -

गठबन्धनय् खटपट शुरु

येँ (नेपालभाषा टाइम्स)- सत्ता गठबन्धन दुने दुथ्याःगु माधव नेपाल नेतृत्वया नेकपा (एकीकृत समाजवादी) व सीके राउतया जनमत पार्टी थौंकन्हय् गठबन्धन खनाः तम्वयाच्वंगु खँ सीदुगु दु । खास यानाः न्ह्यःने वयाच्वंगु राष्ट्रिय सभाया चुनावय् थःपिंत म्हो जक सिट बिल धइगु खँयात कयाः निगुलिं पार्टी दुने गठबन्धन विरुद्ध असन्तोष ब्वलनाच्वंगु खँ धाःगु दु ।

थःपिनि असन्तुष्टि ब्वयेगु झ्वलय् जनमतया अध्यक्ष सीके राउतं थीथी सभाय् न्ववायेगु झ्वलय् गठबन्धनया तःधंगु दलतय्सं थःथः जक बैठक च्वनाः निर्णय याइगु व थःपिंत धाःसा उकिया बोधार्थ जक क्यनेगु यानाच्वन धायेगु यानाच्वंगु दु । छुं जुयाः कन्हय् सरकार त्वःतेमाःगु अवस्था वल धाःसा उकिया वातावरण तयार यायेमाः धकाः जनमत पार्टीं थः हे दुथ्याःगु सरकारयात ज्ञापनपत्र बीगु ज्या नं याःगु दु । जनमतं रुग्ण उद्योग याकनं सञ्चालन यायेमाःगु, ल्याय्म्हतय्त रोजगारी सिर्जना यायेमाःगु धासें ज्ञापनपौ लःल्हाःगु खः ।

अथे हे नेकपा (एसं) नं राष्ट्रिय सभाया चुनावय् थःगु पार्टीयात निगू सिट जक बिल धासें असन्तुष्टी प्वंकूगु दु । पार्टीं आः तक सरकारं यानाच्वंगु ज्याखँया विवरण बुझे या धकाः थः मन्त्रीतय्त निर्देशन नं बिउगु दु ।

उगु पार्टीया सम्मानित नेता लिसें पुलांम्ह प्रधानमन्त्री झलनाथ खनालं ला सरकार त्वःतेगु बारे पार्टी दुने समीक्षा जुयाच्वंगु खँ समेत कनादीगु दु । वय्कलं गठबन्धनया संस्कृति कथं कांग्रेस व माओवादी न्ह्याः मवंगु द्वपं बिसें वंगु सोमवाः च्वंगु पार्टीया बैठकय् नं सरकार त्वःतेमाःगु बिचाः तयादीगु खः । बैठकय् सम्मानित नेता खनालं धयादिल, ‘कांग्रेस माओवादीं झीत पेले याना वनाच्वंगु दु । स्थानीय तहया निर्वाचनंनिसें झीत पेले यानाच्वंगु खः । गठबन्धन गबलय् तक धइगु बारे मुक्कं पार्टीइ खँ जुयाच्वंगु दु । समीक्षा यानाः क्वःजी ल्यं दनि । गठबन्धन दुने आः जि न्ह्यनाच्वनेत तकं तसकं असहज जुइधुंकूगु दु ।’

थःपिनिगु कारणं हे कांग्रेस व माओवादी ल्ह्वना वःगु खः धासें तःधंगु पार्टीया गलत नीतिया कारणं राष्ट्रियसभा निर्वाचनय् उचित सिट मवःगु द्वपं नं वय्कलं बियादीगु दु ।
गठबन्धनया ज्याखँ खनाः नेता खनाल न्हापा नं सन्तुष्ट मदुसा थ्व खँय् पार्टी अध्यक्ष माधव नेपाललिसे समेत वय्कःया खँ मिले मजूगु सीदुगु दु ।