वज्राचार्य संरक्षण गुथिया स्वीखुक्वःगु दँमुँज्या

येँ- वज्राचार्य संरक्षण गुथिया स्वीखुक्वःगु दँमुँज्या वंगु चिल्लाथ्व सप्तमि (चैत ७ गते) शनिवाःकुन्हु जुल । गुथिया नायः गम्भिर वज्राचार्यया सभाध्यक्षताय् जूगु दँमुँज्याय् न्वकु सागरमान वज्राचार्यं लसकुस यानादीगु खः ।

दँमुँज्याय् रत्नकेतु महाविहार झ्वाःबहाःया चक्रेश्वरलिसें गुथिया संस्थापक दुजः फणिन्द्ररत्न वज्राचार्यं गुथिया आवश्यकता व महत्वयात कयाः नुगःखँ प्वंकादीगु खः । लिसें वय्कलं स्वयम्भूय थें हे लाय्कुलिइ जुइगु देय् आचागूया इलय् जलपानया व्यवस्था यायेत धासें झिद्वः तका दां नं गुथियात लःल्हानादीगु खः ।

गुथिया मूछ्याञ्जे मुनिन्द्ररत्न वज्राचार्यं वार्षिक प्रतिवेदन व दांभरिं रमेशरत्न वज्राचार्यं आर्थिकलिसें लेखापरीक्षणया प्रतिवेदन न्ह्यब्वयादीगु खः ।

ज्याझ्वलय् गुथिया दुजःपिं गुणिन्द्ररत्न वज्राचार्य, सुदर्शनमुनि वज्राचार्य, आनन्दमुनि वज्राचार्य, राजेन्द्रमान वज्राचार्य लगायतं थःथःगु नुगःखँ प्वंकादीगु खः ।

दँमुँज्याया झ्वलय् थुगुसी देय् आचागू पाः फइपिं स्वम्ह पाःलाःयात म्हतिं नीन्याद्वः तका दां अनुदानकथं लःल्हाःगु खःसा प्रा. भूपतिरत्न वज्राचार्यं गुथिया नायः वज्राचार्ययात हनापौ देछासे अभिनन्दन याःगु खः ।

येँ देय्या वज्राचार्यपिनिगु देय् आचागू थ्व हे वइगु चिल्लागा अस्तमि व नवमिनिन्हुयंकं जुइ । न्हापांगु न्हि स्वयम्भूया शान्तिपुलिइ व निन्हुया ज्याझ्वः येँ देय्या लाय्कूस्थित नासःचुकय् जुइ ।