किपुलिइ स्नातकय् शतप्रतिशत व स्वास्थ्यय् पचास प्रतिशत छुट सुविधा

किपू(नेपालभाषा टाइम्स)- किपुलिइ ‘एक घर–एक स्नातक’ ज्याझ्वःकथं किपूया सामुदायिक कलेजय् स्नातक तह अध्ययनय् शतप्रतिशत छुट व किपू अस्पतालय् वासः यायेगुलिइ पचास प्रतिशत छुट सेवा लागू जुइगु जूगु दु ।

किपू नगरपालिकाय् वंगु भाद्र ५ गते जूगु सहमतिकथं किपूया स्थायी बासिन्दापिंत उगु सेवा, सुविधा लागू यायेत्यंगु खः । किपू नगरपालिकां स्थायी बासिन्दायात स्नातक तह अध्ययनय् निःशुल्क सेवा, सुविधा बीगु नितिं स्वंगू सामुदायिक कलेज मंगल बहुमुखी क्याम्पस, सहीद स्मारक कलेज व जनाधार क्याम्पसनापं सहमति याःगु खःसा पचास प्रतिशत छुट सेवाया नितिं फेक्ट नेपालपाखें संचालन जुयाच्वंगु किपू अस्पताललिसे आइतवाः छगू ज्याझ्वःया दथुइ सम्झौता पती ल्हाःचिं तःगु खः ।

स्नातक तह अध्ययनय् मानविकी, शिक्षा व ब्यवस्थापन संकाय अध्ययन याइपिं किपूया स्थायी बासिन्दा ब्वँमिपिन्त थुगु शैक्षिक दँनिसें ६० प्रतिशत नगरपालिकापाखें व ४० प्रतिशत कलेजपाखें खर्च यायेगु सहमति पत्रय् न्ह्यथनातःगु दु । अथेहे स्वास्थ्य उपचारय् थ्व स्वयां न्ह्यः नगरवासीयात १५ प्रतिशत छ्यापं व स्वास्थ्य वीमा सुविधा बिया वयाच्वंगु खःसा थुगुसीनिसें छुं छुं सेवा शुल्क बाहेक मेगु आपालं सेवाय् बछि छुट बीगु नं सहमति पतिइ न्ह्यथनातःगु दु ।

कलेज व अस्पतालनापं जूगु सहमति पतिइ किपू नगरपालिकाया मेयर राजकुमार नकःमि व फेक्ट नेपालया कार्यवाहक अध्यक्ष डा. भरतकुमार प्रधानं ल्हाःचिं तयादीगु खः । नगरपालिका ज्याकूया सभा हलय् जूगु ज्याझ्वलय् नगरया सल्लाहकारपिं, उपमेयर शुभलक्ष्मी शाक्य, प्रमुख प्रशासकिय अधिकृत राजेन्द्र कार्कीलिसे थीथी समितिया दुजःपिं, जनप्रतिनिधिपिं व कर्मचारीपिनि नं ब्वति दुगु खः ।

सम्बन्धित बुखँ

LEAVE YOUR COMMENTS