‘कोशी प्रदेश’ विरुद्ध प्रदर्शन
येँ (नेपालभाषा टाइम्स)÷प्रदेश नं. १ या नां ‘कोशी प्रदेश’ तःगु विरुद्ध पहिचान पक्षधर आदिवासी जनजाति–तय्सं प्रदर्शन शुरु याःगु दु ।
प्रदेश १ लागाय् लाःगु थीथी नगरय् म्हीगंनिसें विरोध ज्याझ्वः शुरु जूगु खः । उगु लागाय् कोशी प्रदेश धकाः च्वयातःगु पम्प्लेट च्याकाः नं विरोध प्रदर्शन याःगु खः ।
अथे हे पहिचान पक्षधर आदिवासी जनजातितय्सं थीथी थासय् मशाल जुलुस पिकयाः नं थ्व नामाकरण यायेगु ज्याया विरोध याःगु दु । गुलिखे थासय् सतक अवरुद्ध यानाः नं नामाकरण विरुद्ध प्रदर्शन यानाच्वंगु दु ।
थ्वहे झ्वलय् माओवादीया प्रदेश सभाया संसदीय दलया नेता इन्द्र बहादुर माङ्बों प्रदेशया नामाकरण थ्वहे अन्तिम मखु, कन्हय् प्रदेश दुने थःपिनि दुई तिहाइ बहुमत वल धाःसा थ्व नां खारेज यानाः हानं पहिचानवादी नां हे तयेमानि धयादीगु दु ।
सूत्रतय्सं धाःकथं प्रदेश १ या मुख्यमन्त्री हिक्मत कार्कीं येँय् वयाः माओवादी अध्यक्ष पुष्पकमल दाहालयात प्रदेशया नां कोशी तये माली धकाः प्रस्ताव तःबलय् दाहालं अनं तुं थः संसदीय दलया नेता माङ्बोयात फोन यानाः कोशी प्रदेश धइगु नामय् हे मतदान यायेत निर्देशन बियादीगु खः ।
थ्वहे झ्वलय् नेपाल समाजवादी आदिवासी जनजाति महासंघया अध्यक्ष अनुप सिं सुवालं छगू विज्ञप्ति पिकासें थथे भूगोलया आधारय् प्रदेशया नां तयेगु ज्यां देशय् परिवर्तन हयेत आदिवासी जनजातितय्सं याःगु बलिदानया अपमान जूगु दु धयादीगु दु । लिसें नेपाल समाजवादी नेवाः संघया नायः दिलीप शाहीं नं वक्तव्य मार्फत कोशी प्रदेशया विरोध यानादीगु दु ।
LEAVE YOUR COMMENTS