क्यानं सन्दीप लामिछानेया निलम्बन यात
एजेन्सी- नेपाल क्रिकेट संघ (क्यानं) क्रिकेट कासामि सन्दीप लामिछानेयात निलम्बन याःगु दु । लामिछानेयात बलात्कारया द्वपनय् दोषी ठहर याःगु येँ जिल्ला अदालतं बुधवाः वयात च्यादँँया जेल व न्यागू लाख जरिवानाया सजाय न्यंकूगु खः । अदालतं जेल सजाय क्वःछीधुंकाः क्यानं बिहिवाः छगू विज्ञप्ति पिकयाः लामिछानेयात घरेलु व अन्तर्राष्ट्रिय क्रिकेट म्हितेमखनीगु कथं निलम्बन यानागु धाःगु खः ।
क्यानं पित बिउगु विज्ञप्तिइ जिल्ला अदालतया २०८० पौष १३ गतेया फैसला व पौष २५ गते कसुर ठहर जूगु आदेश बामेजिम नेपाः राष्ट्रिय क्रिकेट टिमया कासामि व पुलांम्ह कप्तान सन्दीप लामिछानेयात जबरजस्ती करणी मुद्दाय् सजाय निर्धारण याःगुलिं वयात घरेलु व अन्तर्राष्ट्रिय क्रिकेट गतिविधिइ निलम्बन यानाःगु जानकारी बिया धयातःगु दु ।
सन्दीपयात थगुने छम्ह नाबालिग मिसाया बलात्कार याःगु द्वप लाःगु खः । थ्व घटना जुइधुकाः क्यानं सन्दीपयात निलम्बन याःगु खः । उगु इलय् लामिछाने क्रिकेट म्हितेत पिहां वनाच्वंगु खः । व अनं तुं बिसिउँ वनाच्वंबलय् प्रहरीं डिफ्युजन नोटिस जारी यायेवं विदेशं लिहांवःम्ह लामिछानेयात विमानस्थलय् ज्वंगु खः । थ्वयां ९९ न्हु लिपा उच्च अदालतं वयात २० लाख धरौटीइ त्वःतूगु खः । लामिछाने रिहा जुइधुंकाः क्यान वयागु निलम्बन फुकुवा याःगु खःसा थ्व लिपा वं हाकनं राष्ट्रिय टिमपाखें म्हिताच्वंगु खः । सन्दीप लामिछानें थः निर्दोष धयावयाच्वंगु दु । आः वं उच्च अदालतय् पुनरावेदन याइगु खँ धाःगु दु । मेखे सरकारी वकिलत नं अदालतं पीडितयात नाबालिक ठहर मयाःगुलिं उकियात कयाः पुनरावेदन वनेगु धयाच्वंगु दु ।
लामिछानें नेपाःया निंतिं आःतक ५१ एकदिवसीय व ५२ टि–२० कासा म्हितीगु दु । एकदिवसीय कासाय् दकलय् याकनं सछिगू विकेट काःम्ह नेपाली कासामिया रेकर्ड सन्दीपयागु खः । लामिछानें एकदिवसीय कासाय् आःतक ११२ व टि–२० क्रिकेटय् ९८ विकेट काःगु दु ।
LEAVE YOUR COMMENTS