युएई सिंगापुरयात २०१ रनं बुकल

येँ (नेपालभाषा टाइम्स)÷ एसिसि प्रिमियर लिगया आइतवाः जूगु कासाय् युएई सिंगापुरयात २०१ रनया तःधंगु अन्तरं बुकूगु दु । न्हापां ब्याटिङ याःगु सिंगापुरं कप्तान मोहम्मद वसिम व वृत्य अरबिन्दया विस्फोटक ब्याटिङया ग्वाहालिं सिंगापुरयात ४७२ रनया विशाल लक्ष्य बिउगु खः । लिसलय् ब्याटिङ याःवःगु सिंगापुर ५० ओभरय् ९ विकेटया क्षतिइ २७० रन दयेकाः अलआउट जूगु खः । थ्व पराजय लिसें सिंगापुर धेंधेंबल्लाखं पिने लाःगु दुसा युएई सेमिफाइनलय् वनीगु बल्लाःगु सम्भावना दुगु टिम जूगु दु ।

युएईयात विशाल योगफलपाखे यंकेगु झ्वलय् अरबिन्दं १३३ बलय् १७ चौका व ७ छक्का थ्वासें १७४ रनया योगदान बिउगु खः । अरबिन्द ४८ ओं ओभरया स्वंगूगु बलय् रमेश कलिमुथुया बलय् अब्दुल रहमानपाखे क्याच आउट जूगु खः । थ्वयां न्ह्यः कुवेत विरुद्धया कासाय् नं अरबिन्दं १८५ रनया इनिङ म्हितूगु खः ।

अथेहे कप्तान मोहम्मद वसिमं ८२ बलय् ९ चौका व १६ छक्का थ्वानाः १६० रन दयेकल । वसिम २८ औं ओभरया न्यागूगु बलय् आदित्य भर्गवया बलय् मनप्रित सिंहपाखें क्याचआउट जूगु खः । वसिमं ३४ बलय् अर्धसतक व ६४ बलय् सतक पूवंकूगु खःसा अरबिन्द ५२ बलय् अर्धसतक व ९६ बलय् सतक पूवंकूगु खः । निगूगु विकेटया निंतिं अरबिन्द व वसिमं २४६ रनया साझेदारी याःगु खः ।

युएईया निंतिं आयन खानं ७४ रन, आर्यन लाक्रां १२ रन, आसिफ खान ११ रन व रोहन मुस्तफां ३ रन दयेकूगु खः ।

सिंगापुरया निंतिं आदित्य भर्गवं ८ ओभरय् ८५ रन खर्च यानाः प्यंगू विकेट काःगु खःसा विनोथ भास्करं निगू, मनप्रीत सिंहं छगू, रमेशले कलिमुथुं स्वंगू विकेट काःगु खः ।
आइतवाः हे जूगु मेगु कासाय् जतिन्दर सिंहया सतकया ग्वाहालिं ओमानं मलेसियायात ८ विकेटं बुकल । विजयया निंतिं २२८ रनया लक्ष्य ज्वनाः ब्याटिङ याःवःगु ओमानं ४१.४ ओभरय् निगू विकेटया क्षतिइ विजय लक्ष्य पूवंकूगु खः ।