जनकविबारे बिस्कं साहित्यिक ज्याझ्वः

येँ – जनकवि दुर्गालाल श्रेष्ठया साहित्य यात कयाः छगू बिस्कं कथंया साहित्यिक ज्याझ्वः याइगु जूगु दु । ‘सर्जक व सिर्जना’ नां तयाः नेपालभाषा एकेडेमिं उगु ज्याझ्वः यायेत्यंगु खः ।

थ्वहे वइगु चौलागा सप्तमि (वि.सं.२०७९ बैशाख १०) कुन्हु किपुली च्वंगु एकेडेमिया हलय् उगु ज्याझ्वः जुइगु खँ एकेडेमिया सदस्यसचिव डा. पुष्पराज राजकर्णिकारं कनादीगु दु ।

वय्कःया कथं उगु ज्याझ्वलय् जनकवि श्रेष्ठया कृतियात कयाः थीथी व्यक्तित्वपिंपाखें दुवालेगु नापं वय्कलं च्वयादीगु थीथी म्ये थीथी लोकंह्वाःपिं कलाकारपिंपाखें न्ह्यब्वयेगु ज्या नं जुइ ।

लिसें ज्याझ्वलय् जनकवि श्रेष्ठपाखें थःगु थीथी रचना वाचन नं जुइगु खँ धाःगु दु । ज्याझ्वलय् जनकवि दुर्गालालया समग्र व्यक्तित्व पिलुइ कथंया मन्तव्य तयेगु लिसें प्रस्तुती न्ह्यब्वइगु खँ नं ग्वसाः खलकं धाःगु दु । जनकवि दुर्गालाल श्रेष्ठया नेपालभाषा व खस नेपाली भासं समेत यानाः बासःगू स्वयां अप्वः सफू पिदनेधुंकूगु दु ।