वार्ताय् वयेत विप्लवया स्वंगू शर्त
विप्लवया नेता प्रचण्डया सम्पर्कय् दुगु दावी
येँ – प्रतिबन्धित नेत्रविक्रम चन्द नेतृत्वया नेपाल कम्युनिष्ट पार्टीं सरकारया लिसे वार्ता यायेगु निंतिं स्वंगू सर्त न्ह्यःने तःगु दु । विप्लव पुचःलिसे सम्पर्क तयाच्वंपिं सरकारी सूत्रतय्सं उमिसं थ्व शर्त तःगु खँ सूत्रं धाःगु दु ।
विप्लव पुचलं सरकारलिसे वार्ताया लागिं थःगु पार्टीयात सरकारं तयातःगु प्रतिबन्ध फुकुवा यायेमाःगु, ज्वनातःपिं फुक्कं नेता कार्यकर्तायात निःशर्त त्वःतेमाःगु व थःपिंत राजनीतिक पार्टी सरह व्यवहार यायेमाःगु माग न्ह्यःने तःगु खँ सीदुगु दु ।
थुकिया लिसें वार्ताया निंतिं सरकारं सार्वजनिक रुपं पौ च्वयेमाःगु व सरकारी समितिं पार्टीया महासचिव वा निगूगु वरियताया नेतातय्त नापलायेमाःगु शर्त नं उमिसं तःगु खँ धाःगु दु । थ्व स्वयां न्ह्यः सरकारं गठन याःगु वार्ता समितिं नं विप्लव पुचःयात राजनीतिक रुपं व्यवहार यायेमाःगु सुझाव सरकारयात बिया वयाच्वंगु खः ।
विप्लव पुचःलिसे वार्ता यायेगु निंतिं सरकारं प्रधानमन्त्री केपी शर्मा ओली व पुष्पकमल दाहाल नेतृत्वया नेकपाय् दुहां वंम्ह पोलिटब्युरो दुजः पदम राईपाखें कुतः यानाच्वंगु खँ सीदुगु दु । सूत्रया कथं लिपांगु इलय् विप्लव पुचःया छुं नेतात अध्यक्ष पुष्पकमल दाहालया सम्पर्कय् च्वनाच्वंगु दु ।
सरकारं विप्लव पुचःलिसे वार्ता यायेगु धकाः धाःसां नं आः तक वार्ता यायेगु निंतिं छुं कथंया पुचः धाःसा दयेकूगु मदुनि । न्हापा सरकारं थीथी पुचःलिसे वार्ता यायेगु निंतिं सांसद सोमप्रसाद पाण्डेया नेतृत्वय् नीस्वंगु समिति भंग जुइधुंकूगु दु । सरकारं उगु इलय् उच्चस्तरीय वार्ता पुचः नीस्वंगु खःसा उगु पुचलं थीथी २७ गू भूमिगत संगठनलिसे वार्ता नं याःगु खः ।
उगु वार्ता पुचः वंगु पुस ११ गते भंग जूगु खः । भंग जूगु समितिं थःगु सुझाव बीगु झ्वलय् विप्लव पुचःलिसे वार्ता यायेगु खःसा बिस्कं उच्चस्तरीय पुचः दयेकेमाःगु सुझाव सरकारयात बिउगु खः । तर आः तकं सरकारं पुचः गठन मयाःगुलिं यानाः वार्ता न्ह्याकेत धाःसा समस्या जुयाच्वंगु दु ।
LEAVE YOUR COMMENTS