व्यस्त बजाः लागा जूगुलिं आपालं समस्यात दु

सुजन विलास वज्राचार्य
येँ महानगरपालिका २४ वडा अध्यक्ष उम्मेदवार, नेकपा (एमाले)

छिगु एजेन्डा छु छु खः ?
स्थानीय निर्वाचन लक्षित व येँ महानगर केन्द्रीत यानाः नेकपा (एमालें) थःगु हे घोषणा पत्र जारी याःगु दु । जिमिसं नं वडावासीया निंतिं छुं छुं एजेन्डा ल्ह्वनागु दु । गथेकि भाषा, धर्म, संस्कृति, सम्पदा, विकास निर्माण विज्ञान प्रविधि, पर्यटन, व्यापार, फोहर, त्वनेगु लःया व्यवस्थापन, धः निकास, सामाजिक, आर्थिक, सांस्कृतिकलिसें मिसा, मस्तय् हकहित, स्वास्थ्य, विपद् व्यवस्थापन, असहाय, अशक्त, वेवारिस व्यक्तिया सहायता, शिक्षा, खेलकुद व ल्याय्–म्हतय् निंतिं ज्या यायेगु एजेन्डाय् दुथ्याकागु दु ।

वडाय मुख्य समस्यात छु खः ?
वडाय् आपालं समस्यात दु । खने दयेक दुगु समस्या व खने मदयेक वयाच्वनीगु समस्यात आपालं दु । अय्नं मुख्य समस्या धइगु ला अव्यवस्थित पार्किङ, फुटपाथ हे खः । उकिया नापनापं मेगु मुख्य समस्या धइगु धःया निकास, त्वनेगु लःया व्यवस्थापन यायेगु खः । थ्व वडा धइगु येँ देय्या नुगःचु न्हूसतक, वंघः थेंज्याःगु अतिकं व्यवस्तगु थाय् लानाच्वंगुलिं आपालं हे समस्यात दु ।

छि निर्वाचित जुयादी धइगु आधार छु ?
थ्व वडाया वडावासीं न्हापा नं नेकपा (एमाले)या उम्मेदवारयात प्यानल हे त्याकूगु वडा खः । व नं अत्याधिक बहुमतं । वडाय् पुरा प्यानल हे निर्वाचित जूगुलिं जिमिसं न्यादँतक दत्तचित्त जुयाः वडावासीया सेवा याना, वडाया निंतिं ज्या याना । गुकिया लिच्वं थुगुसी चुनाव प्रचारया झ्वलय् खनाच्वना । जनताया जिपिंप्रतिया भलसा, विश्वास गुगु न्हापा दु, व आः नं कायम दु । थ्व कारणं निक्वःखुुसी नं त्याइ धइगु जिमित विश्वास दु ।

निर्वाचित जुया वयेधुंकाः न्हापां छु यानादी ?
निर्वाचित जुया वयेधुंकाः दकलय् न्हापां थनया मू समस्याया रुपय् दयाच्वंगुयात संबोधन यायेगु जुइ । व धइगु थनया अव्यवस्थित पार्किङ, फुटपाथयात व्यवस्थित यायेगु, धःया निकास व त्वने लःया व्यवस्थापनया निंतिं ज्या न्ह्याके । उकिया नापनापं वडाया आवश्यकता स्वयाः प्राथमिकता बियाः ज्या न्ह्याका वने ।

स्थानीय भाषा, कला, संस्कृतिया उत्थानया निंतिं छु ग्वसाः दु ?
जि स्वयं थः हे छम्ह भाषिक कार्यकर्ता नं जूगु ल्याखं जिमिसं न्ह्यब्वयागु एजेन्डाया न्हापांगु बुँदाय् हे भाषा, धर्म, संस्कृति, सम्पदाया निंतिं ज्या यायेगु खँ न्ह्यथनातयागु दु । खतुं थ्व विषयवस्तु नं अतिकं संवेदनशील । कला, संस्कति संरक्षणया निंतिं स्थानीय क्लब, खलः, पुचःलिसे समन्वय यानाः न्ह्याः वनेगु जुइ । नेपाल लिपिया प्रवद्र्धन यायेकथं त्वाःबहाःया नां रञ्जना लिपिं तयेगु अभियान न्ह्याके ।
अथे हे भाषाया सन्दर्भय् येँ महानगरं माध्यमिक तहतक लागू यानातःगु नेपालभाषां ब्वंकेगु व्यवस्थायात तिबः बीकथं अझ ब्यापक व विस्तृत याना वनेगु निंतिं पहल यायेगु बचं बियाच्वना ।

सम्बन्धित बुखँ

LEAVE YOUR COMMENTS