उजुरी मलाःसां अनुसन्धान जुइमाः

येँ – सभामुख पदं राजीनामा बिउम्ह कृष्णबहादुर महरायात लाःगु यौन दुव्र्यवहार द्वपं बारे पीडित मिसां थःगु धापू हिउसां नं थुकिया अनुसन्धान धाःसा दिके मजिउगु खँ फौजदारी कानूनया वकिलतय्सं धयाहःगु दु । फौजदारी कसुरया द्वपनय् सुुचं वयेवं प्रहरीं अनुसन्धान यायेमाःगु बाध्यतात्मक अवस्था दुगुलिं अनुसन्धान दिकेमजिउगु तर्क वकिलतय् दु ।

संघीय संसदय् ज्या यानाच्वंम्ह रोशनी शाहीं थःत महरां यौन दुव्र्यवहार याःगु धकाः सञ्चार माध्यमयात धायेवं मंगलवाः सभामुख महरां राजीनामा बिउगु खःसा महरां थःत वःगु द्वपंया खण्डन नं यायेधुंकूगु दु । मंगलवाः पीडित शाहीं थम्हं हे द्वपंया खण्डन याःगु भिडिओ सार्वजनिक जुइधुंकाः आः प्रहरीं न्ह्याकूगु अनुसन्धान छु जुइ धइगु न्ह्यसः ब्वलनाच्वंगु दु ।

फौजदारी कानूनया जानकारतय्सं धाःसा पीडित धाःम्ह मिसां थीथी सञ्चार माध्यमपाखें महरां थःत बलात्कार यात धाःगु खँ थम्हं हे खण्डन याःगु खःसां प्रहरी थःगु अनुसन्धानं लिचिले मजिउगु खँ धाःगु दु ।
फौजदारी कानून सम्बन्धी वरिष्ठ अधिवक्ता लिसें प्राध्यापक रजितभक्त प्रधानाङं धयादी, ‘थ्व सामान्य द्वपं मखु, अथे जुयाः उजुरी मवल वा पीडित धाःम्ह मिसां थःगु बोली हिल धकाः अनुसन्धान दिकेगु मिले मजू ।’
वय्कःया कथं प्रहरी थम्हं हे अनुसन्धान न्ह्याके धुंकूगु व पीडित मिसाया छेँय् वनाः प्रमाण तकं मुंके धुंकूगुलिं पीडितं जाहेरी मबिउ वा स्वास्थ्य परीक्षण मयाकू धकाः अनुसन्धान दिकेगु ज्या याये मजिउ ।
मेम्ह फौजदारी कानूनविद् अधिवक्ता सतीशकृष्ण खरेलया कथं नं आःया अवस्थाय् प्रहरीं अनुसन्धान न्ह्याकेमाःगु बाध्यात्मक अवस्था दु । वय्कःया कथं पीडित धाःम्ह व्यक्तिं द्वपंया खण्डन याःसां नं मयाःसां नं आःया अवस्थाय् प्रहरीं अनुसन्धान न्ह्याके हे माःगु कानुनी बाध्यता दु ।
वय्कलं न्ह्यःने धयादी, ‘पीडित धाःम्ह व्यक्तिं द्वपंया खण्डन याःसां नं मयाःसां नं थुकी फौजदारी कानून आकर्षित जुइ । थुकिं कानून कथं अनुसन्धान दिकेगु वा मिलापत्र याके दइ मखु ।’
वय्कःया कथं आः वयाः दकलय् थाकुगु अवस्था धाःसा पीडित मिसाया स्वास्थ्य परीक्षण याकेगुली खनेदु । वय्कलं धयादी, ‘महरा राजनीतिक प्रभाव दुम्ह व्यक्ति जूगुलिं पीडित व साक्षीयात प्रभावित यायेफइगु अवस्थायात तकं ध्यानय् तयाः प्रहरीं अनुसन्धान न्ह्याकेमाः ।’
पुलांम्ह आईजी हेमन्त मल्लं नं पीडित धाःम्ह मनुखं थःगु धापू हिल धायेवं प्रहरीया अनुसन्धान दिके मजिउगु खँ धयादी । वय्कःया कथं पीडित मिसां न्ह्याथेंज्याःगु अभिव्यक्ति बिउसां नं मौखिक उजुरी लानाः अनुसन्धान न्ह्यायेधुंकूगुलिं अनुसन्धान निष्कर्षय् थ्यंकेमाःगु बाध्यता दु ।
वय्कःया कथं थ्व घटनाय् निगुलिं पक्ष मिले जुयाः वःसां नं अनुसन्धान यायेगु ज्या धाःसा जुइमाः । यौन दुव्र्यवहार
सरकारवादी मुद्दा जूगुलिं सुचं वइगु हे प्रहरीया निंतिं उजुरी वःगु थें खः ।
मेखे प्रहरीं थ्व बारे थःपिनिगु अनुसन्धान जारी जुयाच्वंगु खँ धाःगु दु । प्रहरीं थुगु घटनायात गम्भीर रुपं कयाच्वंगु धासें पीडितं जाहेरी मबिउसां नं अनुसन्धान निरन्तर जुइगु खँ धाःगु दु । प्रहरीया कथं बलात्कार व यौन दुव्र्यवहार सम्बन्धी मुद्दाया हदम्याद दछिया दुगुलिं गुुगुं नं इलय् जाहेरी दर्ता जुइ फइगु सम्भावना दु ।

सम्बन्धित बुखँ

LEAVE YOUR COMMENTS