पञ्चवीर सिंह सिरपाः लःल्हात
येँ (नेपालभाषा टाइम्स)÷बु.सं. २५६६ या पञ्चवीर सिंह सिरपाः शनिवाः छगू ज्याझ्वःया दथुइ लःल्हात । दँयद्सं ‘नेपालभाषा टाइम्स’ न्हिपतिइ पिहां वइगु बुद्ध धर्म सम्बन्धी च्वसुत मध्ये उत्कृष्ट जूपिं छम्ह मिसा व छम्ह मिजं च्वमियात थ्व सिरपाः बीगु खः । थुगुसी मिसापाखे प्रेमलक्ष्मी तुलाधर व मिजंपाखे आनन्दमुनि वज्राचार्यं थ्व सिरपाः त्याकादीगु खः ।
ज्याझ्वलय् मूपाहां कथं झाःम्ह प्रा. प्रेमशान्ति तुलाधरं थःगु नुगःखँ तसें नेपालय् थेरवादी बुद्ध धर्म व महायानी बुद्ध धर्मया आरम्भ नेपालभाषां हे च्वयाः जूगु खँ न्ह्यथँसें नेपालभाषा व बुद्ध धर्म धइगु छम्ह हे मनूया निपा तुति थें खः धयादिल । बुद्ध धर्मया प्रचार यायेत पिहां वःगु ‘बुद्ध धर्म व नेपालभाषा’, ‘धर्मदूत’ थेंज्याःगु पत्रिकातय्सं नेपालभाषाया आपालं साहित्यकारत जन्म याःगु खँ न्ह्यथँसें वय्कलं बुद्ध धर्मया साहित्यिक इतिहास च्वयेमाःगु बिचाः नं न्ह्यथनादिल ।
विशेष पाहां कथं झाःम्ह बागमती प्रदेशया सांसद शैलेन्द्र वज्राचार्यं बौद्ध धर्मावलम्बी व नेवाःतय्सं राजनीतिइ नं चिउताः तयेमाःगु खँ कँसें थौंकन्हय् थम्हं बागमती प्रदेशया संसदय् ध्यान भावनाया खँ तयेगु यानाच्वना धयादिल ।
सिरपाःया दाता पञ्चवीर सिंह तुलाधरं थम्हं बौद्ध भिक्षु व भिक्षुणीपिनि लागिं १ करोड ११ लाख ११ हजार १११ तकाया अक्षय कोष पलिस्था यानागु खँ न्ह्यथँसें आः कोषया दां बढे यानाः ५ करोड थ्यंकेमाःगु बिचाः तयादिल । लिसें वय्कलं बुद्ध धर्म व नेपालभाषाया सेवाय् थः सदां समर्पित जुयाच्वनेगु बचं नं बियादिल ।
ज्याझ्वलय् निर्णायक मण्डलया दुजःपिं डा. गौतमवीर वज्राचार्य, उपप्रा. मदनरत्न मानन्धर व साहित्यकार लोचनतारा तुलाधरं थुगुसी दुहां वःगु च्वसुतय् बारे समिक्षा यानादिल । अथे हे ‘नेपालभाषा टाइम्स’ या सम्पादक सुरेश किरण व ईलोहं लय्पौया सम्पादक नरेशवीर शाक्यपिंसं नं नुगःखँ तयादिल ।
ज्याझ्वलय् ईलोहं मचा लय्पतिइ परियत्ति सम्बन्धी उत्कृष्ट च्वसु च्वयादीम्ह मचा च्वमि सजगता मानन्धरयात ‘ईलोहं पञ्चवीर परियत्ति सिरपाः’ नं लःल्हाःगु खः । युवा बौद्ध समूहया संयोजन व समूहया नायः मदनबहादुर तुलाधरया सभापतित्वय् जूगु उगु ज्याझ्वलय् न्वकु राजु शाक्यं लसकुस यानादीगु खःसा दांभरि कल्पना तुलाधरं सुभाय् बियादीगु खः । च्वमिपिनि म्हसीका कमलतारा तुलाधरं बियादीगु खः । ज्याझ्वलय् बुद्ध विहारया भिक्षु सुद्धिकों पञ्चशील पाठ याकाबिज्याःगु खः ।
LEAVE YOUR COMMENTS