सः छगू फरक अभिव्यक्तिया प्यक्वःगु साहित्यिक ज्याझ्वः

यल- सः छगू फरक अभिव्यक्तिया ग्वसालय् थ्व हे वंगु शनिवाः प्यक्वःगु साहित्यिक ज्याझ्वः जुल । साहित्यया विकास यायेगु ल्याखं जूगु उगु ज्याझ्वः थनया इखालखुइ जूगु खःसा ज्याझ्वलय् स्वम्ह बाखं च्वमिं थःथःगु चिबाखं ब्वनादीगु खः ।

ज्याझ्वलय् गोविन्द मान श्रेष्ठं क्या फसाद, पुस्तान्तरण, छिगु गन्तव्य, धौ खुँ नेताजु, न्हूगु नेपाः शीर्षकया चिबाखं, प्रेमकृष्ण निडरं त्वःताःतःपिं द्वहँत, खिचात, सः, भूत ल्वहं, इज्जत शीर्षकया व रत्न क्वजुं पालिका बुल्डोजर, घाः व भुजिं, हाकुम्ह भौ, हाइब्रीड वा पुसा, तुति ख्वः मदुगु खाता) शीर्षकया चिबाखं ब्वनाः न्यंकादीगु खः ।

संस्थाया नायः कवि सुधिर ख्वबिं बाखं ब्वनादीपिंत मतिनाया चिं लःल्हानादीगु खःसा ब्वति कयादीपिं मध्ये छम्ह व्यक्तिं मेम्ह छम्ह व्यक्तियात लुमन्ति चिं लःल्हायेगु झ्वलय् धनलक्ष्मी महर्जनं सुनिल महर्जनयात मतिनाया चिं लःल्हानादीगु खः ।
ज्याझ्वलय् नर्मदेश्वर प्रधान, राजा शाक्य, मथुरा सायमि, केदार सितु, शरद कसाः, समान्त श्रेष्ठ, दिब्या ताम्राकार, रेणु श्रेष्ठलगायत आपालं साहित्यकार व पत्रकारपिंसं नं ब्वति कयादीगु खः ।

सम्बन्धित बुखँ

LEAVE YOUR COMMENTS