मनाङया मस्तय् चिकुलाया कक्षा येँय्
येँ (नेपालभाषा टाइम्स)÷मनाङयात देय्या हे दुर्गम मध्ये छगू जिल्लाया रुपय् कायेगु याः । तर थौंकन्हय् अन तक हे लँ थ्यंगु कारणं मनाङ दुर्गम गां मजुल । थ्व छगू नेपाःया दकलय् बांलाःगु पर्यटकीय लागा मध्ये छगू जुयाच्वंगु दु ।
चिकुलाया इलय् धाःसा अन च्वने फइ मखु । उकिं मनाङया स्थानीय मनूत चिकुलाया इलय् मनाङ त्वःताः क्वय्पाखे लुमुथाय् च्वं वनेगु याइ । चिकुलाया प्यला मनाङया स्कुल नं बन्द जुइ । स्कुल बन्द जुइगु इलय् अन आखः ब्वनीपिं विद्यार्थीतय्त आः येँय् हयाः आखः ब्वंकेगु व्यवस्था याःगु दु । मनाङया नार्पाभूमि गाउँपालिकां न्हापांखुसी मनाङया विद्यार्थीतय्त चिकुलाया इलय् येँय् तयाः ‘घुम्ती कक्षा’ सञ्चालन यायेत्यंगु दु । थथे यायेत्यंगुया कारण छु धाःसां चिकुलाया इलय् जब मनाङ बन्द जुइ, अन च्वंपिं अप्वः धइथें मनूत येँय् वयेगु याइ । न्हापा न्हापा चिकुलां मनाङ त्वःता वइपिं मनूत मनाङं भचा क्वय् दानाक्यू, हुम्दे, लमजुङ आदि थासय् च्वं वइगु खः । तर थौंकन्हय् मनाङेत मनाङं तप्यंक राजधानी येँय् हे वयाः च्वं वयेगु यानाच्वंगु दु ।
मनाङय् होटल व्यवसाय याइपिं अधिकांश मनाङेतय्सं येँय् छेँ न्यानातःगु दु । चिकुलाया इलय् उपिं तप्यंक वहे छेँय् वयाः च्वं वइ । छेँ न्याये मफुपिं मनूतय्सं नं क्वथा जूसां बालं कयाः तयातःगु दु । लमजुङया बेसीसहरं मनाङया चामे तक लँ खुले जुइवं मनाङवासीत चिकुला छले यायेत तप्यंक हे येँय् वयेगु शुरु जूगु खः ।
येँय् वइबलय् उपिं अप्वः यानाः स्वयम्भु, बौद्ध, नमोबुद्ध आदि थेंज्याःगु बौद्ध तिर्थस्थल चाःहिलेगु याइ । प्यला तक थीथी द्यःयाथाय् चाःहिलाः धर्म कमे यायेगु उमिगु इच्छा खः ।
थ्व झ्वलय् अभिभावक व मस्त सकलें येँय् हे दइगु जूगुलिं मनाङया स्कुलय् सञ्चालन जुइगु पढाइ नापं येँय् चले यायेत्यंगु खः । नार्पाभूमि गाउँपालिकाया अध्यक्ष कुञ्जो तेञ्जिङ लामां कनादीकथं थ्व ‘घुम्ती कक्षा’ आःयात स्वयम्भू लागाय् चायेकेगु ग्वसाः जुयाच्वंगु दु । येँया स्वयम्भू लागाय् आपालं मनाङेतय्गु छेँ लानाच्वंगु दु । उकिं मनाङे मस्तय् कक्षा नं अन हे सञ्चालन यायेत्यंगु खः । थथे यायेबलय् मनाङया मस्तय् पढाइ मस्यनीगु खँ अनुमान याःगु दु ।
LEAVE YOUR COMMENTS