५ नंम्बर प्रदेशया संसदय् तोडफोड

स्थायी राजधानी व प्रदेशया नामांकरणय् असन्तुष्टि

येँ (नेपालभाषा टाइम्स) – प्रदेश सरकारं ५ नम्बर प्रदेशया नामांकरणयात व राजधानी क्वःछीगु खँयात कयाः विवाद जुइवं म्हिगः प्रदेश सभाय् कांग्रेसया सांसदपिंसं संसदय् हंगामा याःगु दु । सांसदतय् विरोधया दथुइ प्रदेश सरकारं प्रदेशसभाया बैठकयात निरन्तरता बीवं कांग्रेसया सांसदपिंसं तोडफोड याःगु खः ।

म्हिगः च्वंगु प्रदेशसभाया बैठकय् आन्तरिक मामिला तथा कानुनमन्त्री कुलप्रसाद केसीं प्रदेशया नां व राजधानी सम्बन्धी प्रस्ताव पेश याःगु खः । कांग्रेस सभासदया विरोधया दथुइ सभामुख पूर्णबहादुर घर्तीमगरं बैठक न्ह्याकेत स्वयेवं तोडफोड जूगु खःसा वयां लिपा बैठक थौं तकया निंतिं स्थगित याःगु खः ।

मन्त्री केसीं प्रदेशया राजधानी दाबया भालुवाङ व प्रदेशया नां लुक्बिनी तयेगु प्रस्ताव पेश याःगु खः । मन्त्री केसीं उगु प्रस्ताव पेश यायेवं कांग्रेसया सांसदपिंसं उकिया विरोध यासें तोडफोड यायेगु शुरु याःगु खः । कांग्रेसया सांसदपिंसं लुम्बिनीयात हे स्थायी राजधानी यायेमाःगु माग याना वयाच्वंगु खः । म्हिगःया बैठकय् कांग्रेसया सांसदपिसं असन्तुष्टि प्वंकाः तोडफोड व नाराबाजी यानाच्वंपिं सांसदपिंत घःपः ज्वनाः पिने छ्वयेत मन्त्री केसी निर्देशन बिउगु खः ।

थ्वहे झ्वलय् नेकपाया सचिवालयं थःगु सांसदपिंत प्रदेशया राजधानी दाबया भालुवाङ व प्रदेशया नां लुम्बिनी तयेगुलिं ह्विप जारी याःगु दु। संविधान कथं प्रदेशया नां व राजधानीयात कयाः पार्टी ह्वीप जारी यायेगु व्यवस्था मदुगु खः । तर नेकपां धाःसा थ्व स्वयां न्ह्यः नं प्रदेशया राजधानी क्वःछीगु खँय् ह्वीप जारी याना वयाच्वंगु दु ।

थ्वहे झ्वलय् संघीय समाजवादी पार्टीया नेता डा. बाबुराम भट्टराईं नं पहिचानया न्यागू आधार व सामर्थ्यया प्यंगू आधारय् प्रदेशया ल्याः, सीमा, नां व राजधानी क्वःमछिउगुसे समस्या मज्यनीगु खँ धयादीगु दु। वय्कलं म्हिगः छगू ट्वीट यासें पाप धलिंमं खनी धासें ५ नम्बर प्रदेशया नेकपा-कांग्रेस कार्यकर्ता ल्वापुइ कुहां वयेमाःगु कारणं संविधान च्वयेगु झ्वलय् छुं हे मापदण्ड व आधार मदयेकं उँट थेंज्याःगु प्रदेश दयेकूगु पापया फल आः वयाच्वंगु खँ धयादीगु दु ।

न्हय्गू प्रदेश गुगुं नं कथं सादर्भिक मजूगु खँ धासें वय्कलं आदिवासी जनजातिया म्हसिका व उमिगु पहिचानयात संवोधन मयासें प्रदेशया नामांकरण व उकिया राजधानी क्वःछीगु ज्या अझ नं नेपाःया आदिवासी जनजाति लिसें अल्पसंख्यक जनतायात ध्वँ लायेगु ज्या जुइगु खँ धयादीगु दु ।